SIK misissuutit akeqanngitsut pillugit: Sumut-una pisut?
Misissuutinik akeqanngitsunik qaqugu agguaasoqassagami?
SIK-p siulittaasua, Jess G. Berthelsen taama aperaaq.
Naalakkersuisut sapaatip akunnerani kingullermi tusagassiortunik katersortitsinermi oqarput kommunit sukkasuumik misissuutinik agguaassaassaminnik 40.000-inik pissasut. Taakku kommunit nammineq sukkasuumik nisissuutinik pisinissaminnut akissaqanngitsunut agguaatissallugit isumagissavaat.
Misissuisarnermut periuseq nutaaq
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Tassa utoqqaat inuillu uummatikkut puatigullu nappaateqartut tunillatsissimanermillu ersiuteqartut misissortikkiartorsinnaapput.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Neriniartarfiit imerniartarfiillu sapaatini akunnerni marlunni tulliuttuni unnukkut quliniit ullaakkut tallimat tungaanut matoqqasassapput.
Taamaallaat ajornartorsiutaavoq tamanna kommuninik isumaqatigiissutigineqarsimanngimmat, taakkumi suliassamut qujaannarmata.
Massakkut Naalakkersuisut misissorpaat qanoq ilillutik sukkasuumik misissuuterpassuit agguaatissanerlugit.
Kisianni SIK erinitsalivippoq.
Peqatigiiffik tusagassiuutinut nalunaarummi allappoq Naalakkersuisut qanoq anguniagarnerlutik nalunaarutigisariaqaleraat, tassami sukkasuumik misissuutit ilaasortaminnut akisallaaqimmata.
- Tassami kviktest ataaseq ullumikkut Nuummi 50 kroneqarpoq. Sinerissami akisunerus-saqqooqaaq. Ilaaqutariillu arlaqarsimappata kviktesteqattaarneq ilaqutariinnut aningaa-sarpassuarnik naleqalersinnaavoq, SIK-p siulittaasua Jess G. Berthelsen oqarpoq nangillunilu:
Ilasortagullu ilaqutariit sisamaasimappata ilaqutariit ataasiaannarlutik kviktesterniarunik 200 kronit atoriissavaat, aanalu takorloorsinnaasara aningaasat taakkua sipaarniarlugit qularnanngitsumik arlallit kviktestinik pisissanngillat, taamatullu tuniluunneq sukkanerujusuarmik nunatsinni ingerlaalertussaalluni. Ilaasortattalu nammassinnaanngilluinnarpaat kviktesteralannik piseqattaarnissartik.
AAMMA ATUARUK Kommunit nammineq misissuutinik akeqanngitsunik tunniussuisinnaanngiinnartut
SIK-p aamma paaserusuppaa Naalakkersuisut flokimmuniteteqarnissarput, tassa tamatta coronarsimanissarput anguniarneraat paaserusunnarsivoq massakkut misissuutinik akeqanngitsunik agguaasoqassanngimmat?
- Tamannami anguniarneqarpat paaseerusunnarsivoq sooq ilaasortagut kviktestikasinnut aningaasartuuteqaqattaassappat?
