Kommunit nammineq misissuutinik akeqanngitsunik tunniussuisinnaanngiinnartut

Nammineq misissuutinik pisinissamut akissaqanngitsunut agguaassinissaq kommunit isumagissagaat, Naalakkersuisut ataasinngornermi oqaatigigaluarpaat. Tamannali kommuninut isumaqatigiissutigineqanngilaq.
Kommunit allaffiinut misissuutinik akeqanngitsumik aallernissaq periarfissaanavianngilaq. Assi © : KNR
Allattoq Malik Brøns
januaarip 13-at 2022 14:14

Naalakkersuisut neriorsuutigisaattut nammineq misissuutinik akeqanngitsunik aallersinnaanissaq periarfissaanngikkallassaaq.

Kommunit nammineq misissuutinik akeqanngitsunik akissaqanngitsunut agguaassinissaannik Naalakkersuisut ataasinngormat oqaaseqarnerisa kingorna amerlasuut kommunip allaffianut iluatsitsiffiunngitsumik aalleraluarput.

Misissuisarnermut periuseq nutaaq
 

Misissueriaaseq allanngortinneqarpoq, taamaalilluni eqimattat maluinnaat misissuisarfimmut PCR-imik misissortikkiartorsinnaalerput: 

Tassa utoqqaat inuillu uummatikkut puatigullu nappaateqartut tunillatsissimanermillu ersiuteqartut misissortikkiartorsinnaapput. Aamma inuit angerlarsimaffimminni sukkasuumik misissuutinit tunillatsissimasutut takussutisserneqartut.

Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.

Tamanna misissuisarfiit napparsimmaviillu malinnaasinnaajunnaarnerannik pissuteqarpoq.

Neriniartarfiit imerniartarfiillu sapaatini akunnerni marlunni tulliuttuni unnukkut quliniit ullaakkut tallimat tungaanut matoqqasassapput. 

 

Naalakkersuisummi sukkasuumik misissuutinik 40.000-inik akissaatikinnerusunut immikkoortitsipput, taakkulu kommuninut agguaanneqartussanngortippaat.

Kommuneqarfik Sermersoorli naapertorlugu paasissutissaq tamanna kommunit ilisimasaqarfiginngeriigartik tupaallaatigaat.

- Tusagassiortut katersortinneqarnerisa kingorna kommunit tallimaasut suliassaq tiguniarnagu aalajangerput. Ilaatigut kommunit innuttaasut akissaatikitsuunersut naliliiffiginissaannut inatsisitigut tunngavissaqanngimmata, tamannalu misissuutissanik innuttaasunut tunniussinissamut tunngavigineqartussaavoq, Sermersooq kommunit tallimat sinnerlugit allappoq.

AAMMA ATUARUK Misissuisarfiit napparsimmaviillu ilungersungaatsiarmata kikkunnut tamanut PCR-imik misissuisoqartarunnaartoq

Taamaammat kommunit allaffiinut misissuutinik akeqanngitsumik aallernissaq periarfissaanavianngilaq.

Kommunilli misissuutinik 300.000-nik pissarsinissartik isumaqatigiissutiginikuuaat, taakku eqimattanut allanut atorneqassasut, Kommuneqarfik Sermersooq allappoq.

- Kommunit tallimaasut misissuutinik 300.000-inik Namminersorlutik Oqartussaniit tunineqarnissamut neriorsorneqarput, misissuutilli taakku kommunit sullissiviini, soorlu paaqqinniffinni tuniluunnermik isitsaaliiniarluni sulisunit atorneqartussaapput.

KNR-ip Naalakkersuisut oqaaseqartinniarsarai.