Partiit Løkkemut: Jomfruøerne utoqqatserfigikkit
Tikeraarnerali pivoq Folketingimi partiit arlaqartut piumasaqaateqaraluartut.
SF, Enhedslisten, Alternativet aamma Radikale Venstre piumasaraat Løkke pisortatigoortumik utoqqatsissasoq Danmarkip inussiaateqarnermut inussianillu tuniniaanermut peqataasimanera pillugu.
- Foghip politikeriunini takutippaa aniguisitaanermiit ukiut 60-inngorneranni utoqqatserami. Neriukkaluarama Løkke taannatulli naalakkersuisorpalaartumik naalagaaffik sinnerlugu Vestindiske Øer tunineriniit 100-ngortorsiornermi aamma taamaaliorumaartoq, Radikale Venstret siulittaasuat Morten Østergaard Politikenimut oqarpoq.
Løkke ukiortaami oqaaseqarami Vestindisket qeqertaanni pisimasut danmarkip oqaluttuarisaanerani "immikkoortutut ajortutut" aammalu "kanngunartutut" oqaatigai.
AAMMA ATUARUK Ontariop inuit, indianerit metisillu utoqqatserfigai
Taanna tunulequtaralugu partiit isumaqarput Løkke qeqertami innuttaasunut utoqqatsisariaqartoq.
Innuttaasulli danskit ministeriunerannit utoqqatserfigineqarnissartik naatsorsuutigissanngilaat
Venstret politikkikkut oqaaseqartartuat Jakob Ellemann-Jensen Politikenimut taama oqarpoq. Taanna isumaqarpoq Løkkep qeqertani inussianik tuniniaasarsimaneq ajortutut akuerineqarsinnaanngitsutut oqaaseqarfigissagaa. Utoqqatsernerli pisariaqanngitsoq.
- Oqallissutigineqarnissaa ajornakusoortuuvoq. Uangalu inuit namminneq iliuuseqarsimanngitsut iliuusigineqarfigineqanngitsunut sooq utoqqatsernissaat takusinnaanngilara, Jakob Ellemann-Jensen oqarpoq.
Aammattaaq Socialdemokratiet Dansk Folkepatiillu isumaqarput Danmark utoqqatsertariaqanngitsoq.
AAMMA ATUARUK Inuit Labradorimiittut utoqqatserfigineqarnissaat piareersarneqarpoq
AAMMA ATUARUK Hammondip meeqqat misileraanermi peqataasimasut utoqqatserfigineqarnissaat ujartorpaa