VIDEO Hammondip meeqqat misileraanermi peqataasimasut utoqqatserfigineqarnissaat ujartorpaa

Meeqqanik Danmarkimut 50-kkunni aallartitsilluni misilerasimaneq pillugu inuiaqatigiinni taama ikitsigisuni utoqqatserfigineqarneq isumaqassaqisoq, Aleqa Hammond isumaqarpoq.
Allattoq Paarnaq Hansen
oktobarip 23-at 2015 15:24

Meeqqat 22-it Danmarkimut 1951-mi aallartinneqarsimasuni tallimat qulillu akornanniittut ullumi suli inuupput, aallartitaasimasut inuunermini artorsartarsimaqaat, oqaatsitik, kultoorertik minnerungitsumillu ilaquttatik annaagamikkit.

Aallartitaasut ilaata Kristine Heinesenip danskit naalagaaffianiit utoqqatserfigineqarnissaq pisariaqartikkaluarpaa.

-Minnerpaamik utoqqatserfigineqartariarqarpugut soorlu taamak atuariatortitaasimanitsinnik nassuiaanneqarluta taamami pineqarnikuunngisaanarpugut,
Kristine Heinesen oqarpoq. 

Aamma atuaruk Anaanasup erni aallaqqunagu panni aallartippaa

Kalaallit qallunaallu immitsinut pissusilersorfigisarnivut iluatitsinngitsoortut nassuerutigisarnissaat pingaaruteqatoq, Folketingimut ilaasortaq Aleqa Hammond, oqarpoq. Aatsaallu taamaaliorutta illuatungeriittut saammaateqatigiinneq ineriartorfiusoq pilersinneqassasoq taanna isumaqarpoq.

-Isumaqarpunga una pisoq, imaassinnaavoq qallunaat isaanngaanniiit annertoorujussuartut isigineqanngittoq, kisiannili uagut inuiaat kalaallit ikittunguulluta pineqarsimanerput annertoorujussuuvoq.

Aamma atuaruk Ilsimasallip ammasumik pisoqarnissaa amigaatigaa

-Inuppassuarnillu eqquisuulluni aammalu kinaassutsimut inuiattut pineqarnitsinni annertuumik initulluni. Taamaammat isumaqarpunga qaapiaannartumik qaangerneqarsinnaangittoq, Aleqa Hammond KNR-mut oqarpoq.

Aamma atuaruk Meeqqanik misileraasoqarnerani peqataasimasup utoqqatserfigineqarnertik oqaasertalerpaa

Oqaatiginngilaali qanoq iliornikkut danskit naalagaaffiat utoqqatsernissaa sulissutigissallugu.

Danskit naalagaaffiata pisortatigoortumik utoqqatserniarnani 2009-mi oqaatigaa. Red Barnet-i pisortatigoortumik sisamanngormat utoqqatsermat isumaginninermut aamma nunami namminermi ministeriata Karen Ellemannip danskit naalagaaffiata utoqqatserniannginerrani siusinnerusukkut oqaatigineqarnera uteqqippaa.

Aamma atuaruk Meeqqat pinngitsaalillugit aallartinneqartut utoqqatserfigineqanngillat