Anaanasup erni aallaqqunagu panni aallartippaa
Gaabannguaq Rasmussenip anaanaata ernini aallartikkusunngilaa. Taarsiullugu Gaabannguup najaa aallartinneqarpoq. Taanna ateqarpoq Carla Lucia Knakkergaard.
- Qullissani oqartussaasut taamani aalajangernikuummassuk umiarsuarmut ilaallunga Danmarkimut aallartinneqartussaasunga, anaanama nalunnginnamiuk, Qullissani elværkip sannaviullu eqqaanut toqqoqquaanga, umiarsuarlu aallareerpat aatsaat angerlaqqullunga, Gaabannguaq Rasmussen ullumikkut 74-nik ukioqartoq taama oqarpoq.
Aamma atuaruk Meeqqat "misileraataasimasut" sisamat maanna utoqatserfigineqarput
Taanna oqaluttuarpoq meraalluni nunamut allamut takornartaalluinnartumut allarnissaq kajungernarsinnaagaluartoq, Gaabannguaq aallarusussimanngilaq.
- Danmarkiliarnissannut qamuuna ilukkut inerterneqarsimassaanga taamani, aallarusussimanngivippunga Gaagannguaq Rasmussen oqaluttuarpoq.
Taamani takorloorneqarsimasinnaagunaraluarpoq Danmark nuna nuannerunartorsuartut qallunaat nuannersorsuartut takorusussinnaallugit , kisianni taamaaliortoqanngilaq.
Aamma atuaruk: Ilsimasallip ammasumik pisoqarnissaa amigaatigaa
Gaabanngup najaa Carla Lucia Knakkergaard Danmarkimut allartinneqarpoq, ilaqutariinnullu qallunaanut meeravissianngortinneqarpoq, taakkunanilu peroriartorpoq inuunermilu sinnerani kalaallit nunaanni ilaquttaminut annertunerusumik attaveqarani.
Carla Lucia Knakkergaard inuunini pillugu atuakkiorpoq taanna 2012-mi saqqummersinneqarpoq taaguuteqartumik 'Et godt liv trods alt' ‘ taamaakkaluartoq inuuneq ajunngitsumik ingerlavoq,’ meeraanermini inersimasunngornerminilu misigisat pillugit atuakkiaalluni.
Carla Lucia Knakkergaard juunip qaammataani 71-nik ukioqarluni toqukkut qimaguppoq.
Aamma atuaruk Meeqqanik misileraasoqarnerani peqataasimasup utoqqatserfigineqarnertik oqaasertalerpaa
Gaabannguaq Rasmussenip najani 1951-imi Danmarkiliartussanngorluni umiarsuarmut ikimmat kingullermik takugamiuk kingorna inersimasunngoreerlutik takoqqipput.
Aamma atuaruk : Meeqqat pinngitsaalillugit aallartinneqartut utoqqatserfigineqanngillat
Meeqqat 22-it 1951-imi Danmarkiliartinneqartut, pisortatigoortumik Red Barnet-imit ullumi utoqqatserfigineqarput.
Pisortatigoortumik utoqqatserneq eqqissiallannassasoq Gaabannguaaq isumaqarpoq.
- Qujanartumik inunnut taakkununnga pineqartunut tuallannartorujussuussaaq eqqissiallannarlunilu, Gaabannguaq oqarpoq.
Danskit ministeriunerat qallunaat naalagaaffiat sinnerlugu utoqqatsertariaqaraluartoq Gaabannguaq isumaqarpoq.
- Danskit naalagaaffiat utoqqatsertuuppat tuallannassagaluarpoq danskinut Danmarkimillu isiginnittaaseq nunatsinni pitsaanerulissagaluarpoq, Gaabannguaq Rasmussen oqarpoq.
