Meeqqanik misileraasoqarnerani peqataasimasup utoqqatserfigineqarnertik oqaasertalerpaa
-Aalaterinissaraluunniit saperpara aliasungaarama. Eqqarsarpunga ”anaana sooruna aallartippinga?”
Danskit naalagaaffiata, Red Barnetip aamma Røde Korsip kalaallit meerartaannik 22-nik 1951-imi misileraaneranni peqataasimasoq Helene Thiesen, ullumikkut 71-nik ukioqartoq taama oqarpoq.
Aallartitaanermi siunertaasimavoq meeqqat danskit oqaasiinik ilinniarnissaat, Nunatsinnullu uterunik danskisut kultureqalernissaat.
Aamma atuaruk Meeqqat pinngitsaalillugit aallartinneqartut utoqqatserfigineqanngillat
Helene Thiesen arfineq-marluinnarnik ukioqarluni angajoqqaaminit avissaartinneqarpoq. Ukiup aappaa avillugu Danmarkimeereerluni angerlarpoq.
- Anaanaga takugakku eqitaarpara oqaluttuullugulu Danmarkimiininni misigisarpassuannik, qummut saallunga qiviarakku akinngilaanga. Oqaaseqarmalli oqaasii tamaasa paasinngilakka. Ernumaammerujussuarpunga, tassami anaanama oqaasii paasisinnaajunnaarsimagakkit, Helene Thiesen DR-imut oqarpoq.
Aamma atuaruk Danskit naalagaaffiat kalaallit meerartaannut utoqqatsertariaqarpoq
Meeqqat misileraanermi oqaatsiminnik, kulturiminnik ilaquttaminillu annaasaqartut ullumi Red Barnetimit pisortatigoortumik utoqqatserfigineqalerput.
Helene Thiesenip utoqqatserfigineqanissartik qilanaarivaa, kisianni utoqqatserfigineqaannarneq naammangitsoq isumaqarpoq.
- Utoqqatsissut akuerisinnaavara, isumaqarpunga kusanartoq siulliullutik kiisami utoqqatsilermata. Kisianni isumaqarpugut utoqqatsernermit suli annerusumik pisariaqartitsilluta, taarsiivigitinnissarput kissaatigigaluarparput, Helene Thiesen DR-imut oqarpoq.
"Utoqqatserfigineqarnissap utaqqinera" KNR-ikkut ullumi oktobarip 22-ani isiginnaarsinnaavat. Taanna meeqqat 1951-imi Danmarkimut aallartinneqarsimasut, Kristine Heinesenip aamma Carla Lucia Knakkergaardip, misigisaannik piviusulersaarutaavoq.
