Folketingimut qinersineq 2015 SF: IA paasivarput
Partiip siulittaasorisimasaa, Holger K. Nielsen, Politikenimut ullumi oqaraluarpoq, IA-p Danmarkimi talerperliit tapersersorpagit, tamanna IA-p SF-illu suleqatigiinnerannik aseruisinnaasoq.
Inuit Ataqatigiit Folketingimut ullumi qinersineq sioqqullugu periaasiannut tapersersuivugut. SF-ip aningaasaqarnermut tunngasuni oqaaseqartartua Jonas Dahl taama oqarpoq.
- Sunniuteqarnerpaasinnaanermik ujartuineq pissusissamisoortutut isigaara. IA-lu pissutsit taamaanneranni taamaaliormat paasilluarsinnaavara, Jonas Dahl oqarpoq.
Tassalu paasilluarsinnaava, IA-p qinersinerup inernera unnugu paasinarsitinnagu Helle Thornings-Schmidt saamerliillu tamakkiisumik tapersersorusunngimmagit.
Aamma atuaruk IA SF-imit mianersoqqunneqartoq
SF-ip nunanut allanut tunngasuni oqaaseqartartua siulittaasorisimasaalu, Holger K. Nielsen, Aviisimut Politikenimut ullumi oqaraluarpoq, isumaqarluni, Inuit Ataqatigiit talerperliit Danmarkimi statsministeriutitaqalernissaannut tapersersuippat, tamanna eqqumiillunilu ajornartorsiortitsissasoq, taamaalioratarnissaalli nammineq takorluukkatut isigigini.
Inuit Ataqatigiit Folketingimi qilersorsimanani inissisimavoq, kisianni naak suliassani amerlasuuni SF suleqatigigaluaraa, IA-p inissinnera Jonas Dahlip paasilluarsinnaavaa.
- Neriuppunga upperalugulu Helle Thorning-Schmidt Danmarkimi statsministeritut ingerlaqqissasoq. Kisianni IA-p pingaaruteqartumik inissikkaluaruni sunniuteqarusunnini ersersimmagu paasilluarpara. Ilaana, ingammik aningaasanut inatsimmut tunngatillugu isumaqatigiinniarnerni kingullerni IA-p Siumullu pitsaavallaanngitsumik pineqarnerat eqqarsaatigiganni, SF-ip aningaasaqarneq pillugu oqaaseqartartua Jonas Dahl oqarpoq.
Qallunaat aningaasaqarnermut ministeriat, Bjarne Corydon, aningaasanut ukioq manna inatsit pillugu isumaqatigiissusiorpoq, Siumut IA-luunniit isumaqatiginiaqqaarnagit.
Aamma atuaruk Kalaallit savalimmiormiullu Folketingimi ilaasortanngortussat qinersereernermi suleqatigeeqqittariaqarput