IA SF-imit mianersoqqunneqartoq
Danskit partiiat SF partii suleqatigisami Inuit Ataqatigiit Folketingimut qinersineq ullumi naammassineqarpat Helle Thorning-Schmidtimik toqqaanissami qulakkiivissorneqannginneranik nalunaaruteqarnera pillugu mianersoqqussuteqarpoq.
Aviisi Politiken taama allaaserisaqarpoq.
Tamanna Inuit Ataqatigiit SF-illu akornanni suleqatigiinnermut kinguneqassaaq, SF-ip siulittaasorisimasaa maannalu nunanut allanut tunngasunut oqaaseqartartuusoq, Holger K. Nielsen, taama oqarpoq:
- Suleqatigiittoqarsinnaanera gruppitsinniinnissaallu eqqumiillunilu ajornakusuussaaq. Taamatulli pisoqarnissaa ilimagivallaanngilara.
Inuit Ataqatigiilli SF-ip Folketingimi gruppianut ullumikkut ilaasortaanngillat, partiili suliamit suliamut suleqatigisarlugu.
Inuit Ataqatigiit siulittaasuata Sara Olsvigip danskit maanna naalakkersuisui pakatsissutigisimallugit oqaatigisimavaa aammalu partiip Helle Thorning-Schmidt tikkuassappagu Kalaallit Nunaannut tunngatillugu 'pilliuteqartoqartariaqartoq' oqaatigisimallugu.
Aammattaaq Savalimmiuni partiip Republikanerit kina Danmarkimi ministeriunertut toqqarniarlugu siumoorluni oqaatigisimangilaa.
Maajip 27-ani qinersinerup suaarutigineqarneranit isumasiuinerit tamagimmik takutippaat Danmarkimi qinersiviit, Danmarkimi nalunaaqutaq malillugu unnugu arfineq-pingasunut matuppata, qinersinerup inernera naligiiffiungaatsiassasoq.
Nunatsinnit Savalimmiuniillu ilaasortaatitat taamaalillutik qinersinerup inerneranut sunniuteqangaatsiarsinnaapput.