Nalunaarusiaq: Sermersuup inunnik isumaginnittoqarfiani attaveqaqatigiinneq pitsaanngilaq

Nuummi, Paamiuni Ittoqqortoormiinilu inunnik isumaginnittoqarfiit attaveqaqatigiittarneranni tatiginninnginneq atugaavallaarpoq, Namminersorlutik Oqartussat Nakkutilliinermut ingerlatsiviat taama erseqqissaateqarpoq. Aamma politiit Ittoqqortoormiini sukkasuumik suliaqarnissamut periarfissaat pitsaanngillat.

Nuuk, Paamiut Ittoqqortoormiillu imminnut ungasissupilussuupput – tamannalu aamma illoqarfinni pineqartuni Kommuneqarfik Sermersuup ataaniittuni inunnik isumaginnittoqarfiit akornanni suleqatigiinnermut atuuppoq.
Namminersorlutik Oqartussat Nakkutilliinermut ingerlatsiviata nalunaarusiaani nutaami tamanna erseqqissaatigineqarpoq.

”Kommunemi tamarmi Inunnik isumaginnittoqarfimmi sulliviup iluani, sulianut tunngatillugu attaveqaqatigiinneq annertuumik amigaateqartoq,” nalunaarusiami allaaserineqarpoq.

Paamiuni inunnik isumaginnittoqarfimmi sulisut suliat ilaanni killilimmik aalajangiisinnaatitaapput. Taarsiullugulu aalajangiinerit Nuummi ingerlatsivimmi pisussaapput. Paamiunili sulisut naapertorlugit qitiusumik isumaginnittoqarfimmit akissuteqartoqarnissaanik utaqqineq sivisuallaartarpoq, ilaannilu akissuteqarneq ajorluni.

”Tamatuma kingunerisinnaavaa (….) innuttaasut ikiorneqarneq/neqeroorfigineqarneq iluaqutaanerpaasussaq tamatigut pinngitsuussagaat,”Nakkutilliinermik ingerlatsivik nalunaarusiamini taama allappoq.

Nalilerneqarporli Paamiuni inunnik isumaginnittoqarfimmi ’amigaatigineqartut ajornartorsiutinik pingaaruteqarluinnartunik kinguneqanngitsut imaluunniit pisortat sumiginnaanerannik kinguneqanngitsut’. Illoqarfimmilu sulisorineqartut suliassaminnik naammaginartumik suliarinnittutut nalilerneqarput.

AAMMA ATUARUK Pitsanngoriaateqarpoq – isumaginninnerulli iluani kukkuluttornerit suli amerlapput


Nuup Ittoqqortoormiillu akornanni tatiginninnginneq

Aamma Nuummi Ittoqqortoormiinilu inunnik isumaginnittoqarfiit attaveqaqatigiittarneranni tatiginninnginneq atugaavallaarpoq, naak Ittoqqortoormiini isumaginnittoqarfiup ingerlanera pitsaagaluartoq, Nakkutilliinermik ingerlatsivik taama naliliivoq.

Najukkami ingerlatsiviup aammalu Angalasartut akornanni suleqatigiinneq najukkami sulisut sunik suliaqartussaanerannik aammalu Angalasartut sunik aammalu sooq suliaqartussaanerannik ilisimasaqannginnermik malunnaateqartoq, Nakkutilliinermik ingerlatsiviup aamma paasivaa.

Aamma Kitaata Tunullu akornanni aamma ilinniagallit ilinniagaqanngitsullu akornanni akerleriinnerit arlallit nalornineq annertunerulersiinnarpaat.

”Immikkoortitsineq tamanna (…) najukkani sulisunut tamanna misinnartarpoq sulinerminni naammagisimaarneqannginnermik”, Nakkutilliinermik ingerlatsivik taama allappoq.

Politiit sulinerat ajornakusoortupilussuaq

Ittoqqortoormiini ’sullissinerup ineriartornerata pitsaassusaa ajunngilaq - angalasartut ikiortiginerisigut’, nalunaarusiami taama allassimavoq. Tamannalu aamma kommunip politiinik suleqateqarneranut atuuppoq.

Politiinulli atugassarititaasut ajornakusoortupilussuupput, pingaartumik suliat meeqqanik kinguaassiutitigut atornerluinermut tunngasut pineqartillugit. Politiit video atorlugu meeqqat apersortussaavaat, apersuinerillu avataanit ikiorteqarluni ingerlanneqartussaapput,  tamannalu kinguarsaataasarpoq.

Nakkutilliinermik ingerlatsiviup nakkutilliinerata nalaani suliat arlallit nalunaarutigineqarnerinit paasiniaaffigineqarnerisalu aallartinneranit qaammatit arlallit ingerlareersut suli naammassineqarsimanngillat.

Tamannalu meeqqanut atornerlugaasimasunut eqquinerluttarpoq, meeqqanillu kinguaassiutitigut atornerluisoqarneranik suliani suliap eqqortumik ingerlanneqarnissaanik naatsorsuuteqarnermut sunniuteqartarluni, Nakkutilliinermik ingerlatsivik erseqqissaavoq:

”Kinguaattoornerit pingaartumik tamaani akueriuminaatsuupput, tassa naapertuilluarnermik misigissuseq eqqarsaatigalugu.”

Kommuneqarfik Sermersuup tusarniaanermut akissuteqaatimini paasissutissiissutigaa Inunnik isumaginnittoqarfik Politiinik, Isumaginninnermut aqutsisoqarfimmik Peqqinnissaqarfimmillu suleqateqarnermik aallartitsisimasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat