Assi: Paalu Møller/KNR

Sermersuumi nakkutilliineq: Pitsanngoriaateqarpoq – isumaginninnerulli iluani kukkuluttornerit suli amerlapput

Kommuneqarfik Sermersuumi isumaginninnikkut sullissinerup sakkortuumik isornartorsiorneqarnerata kingorna nakkutilliiartoqqittoqarnerani pitsanngoriaateqartoqarnera oqaatigineqarpoq. Sulili malunnaatilinnik ajornartorsiuteqarnera nalunaarusiami erseqqissaatigineqarpoq.

Kommuneqarfik Sermersuumi isumaginninnerup iluani suliaqarneq pitsaanerulerpoq.

Isumaginninnermut naalakkersuisoqarfiup Nakkutilliinermik ingerlatsivianit, Nuummi, Paamiuni Ittoqqortoormiinilu inunnik isumaginnittoqarfinnik 2017-imi ukiakkut 2018-imilu ukiukkut nakkutilliiartortumit taama oqaatigineqarpoq.

AAMMA ATUARUK Sermersuumi meeqqat pisortanit sumiginnagaapput

Nakkutilliinermik ingerlatsiviup 2017-imi nakkutilliiartornerata kingorna suliaqarfik sakkortuumik isornartorsiorneqarpoq, malitseqartinneqartumillu kingorna nakkutilliiartortoqaqqilluni.

Isumaginninnermi sulianit tamarmiusunit 75 procentit kukkuneqarnerat taamani ilaatigut isornartorsiorneqarpoq, kommunillu tungaanit nalinginnaasumik ”isumaginninnikkut sumiginnaasoqarnera” nakkutilliiartortunit inerniliunneqarluni.

Meeqqanik pinerliisimannginnermut uppernarsaatit pissarsiarineqarput

Siuariartortoqarneranulli takussutissaqarpoq. Nalunaarusiamimi allassimavoq: ”Nakkutilliinermik ingerlatsiviup iliuuseqarniarneq annertooq, siunissami suliassat aammalu aaqqissuussinissaq pisariaqartinneqartoq eqqarsaatigalugit, maannakkut pissutsinik atuuttunik isornartulinnillu allanngortitsisussaq tamanna akuersaarpaa”.

Kommuni ilaatigut aaqqissuussaaneq nutaamik ilusilersimavaa aamma inissiinernut ilaqutariinnullu paarsisartunut tamanut meeqqanik pinerliisimannginnermut uppernarsaatit pineqarsimapput. Uppernarsaatit pineqartut suliani amerlasuuni pigineqannginnerat nakkutilliinermi siullermi paasineqarpoq.

AAMMA ATUARUK Meeqqat illersuisuata nakkutilliisut nalunaarusiaat tupaallaatigaa

Aamma sullinneqartut mappiinut allattuisarneq siuariartorfiuvoq. Nakkutilliiartortut misissugassatut tigusaat qarasaasiatigut allattorneqarsimapput, siornatigullu pappiaraatigineqartut aamma tassunga allattorneqarsimallutik.

Allagaatit iliuusissatullu pilersaarutit amigaatigineqartut

Nalunaarusialli annerpaartaa isornartorsiuinermik suli imaqarpoq. Digitalinngortitsisoqaraluartormi suliat suli annertuumik amigaateqarput, amerlasuutigullu suliani Nakkutilliinermik ingerlatsiviup 2017-imi misissuiffigisaani iliuuseqartoqartarsimanani.

”Suliat amerlanersaanni allagaat pisariaqartinneqartoq ataaseq arlallilluunniit amigaataapput, soorlu aalajangiinerit, naatsorsuinerit, innuttaasumut allakkat, nakorsap uppernarsaasiineri il.il. Innarluutilinnik suliaqarfimmi ajornerpaavoq, ajunnginnerpaallunilu soraarnerussutisianik suliaqarfimmi,” Nakkutilliinermik ingerlatsivik taama allappoq, nangillunilu:

AAMMA ATUARUK Sermersooq inunnik isumaginninnermut 40 millioninik aningaasaleeqqittoq

”Tamakku saniatigut Nakkutilliinermik ingerlatsiviup isornartoqartippaa, kommunep pisuni tamani allagaatit pisariaqartinneqartut sumiinnerat ilisimanngimmagu.”

Allagaatit arlalitsigut pappiaraaqqanik allattuivinnik sungaartunik taarserneqarsimapput, aamma sullitat mappiinut allatuisarnermi, kommunit allat pikkoriffiginerusaanni, aalajangersimasumik periaaseqarnissaq amigaataavoq, Nakkutilliinermik ingerlatsivik taama erseqqissaavoq.

Ajornartorsiutaasulli piffissaq sivikitsoq atorlugu aaqqinneqarsinnaannginnerat nalunaarusiami aamma naqissuserneqarpoq, aamma ingerlatsiviup toqqammavissaa nutaaq malinneqassaguni iluamik ingerlalissasoq isumaqatigineqarpoq.

”Nakkutilliinermik ingerlatsiviup paasivaa kommunep taamatut suliniuteqarnermigut nakkutilliinermik nalunaarusiami tikkuarneqartut naammassisinnaajumallugit ingerlatsinerminik allannguiniartoq, meeqqanik suliaqarfiup iluani ingerlatsinissamut tunngavissanik nutaarluinnarnik pilersitsinermigut.”

AAMMA ATUARUK Innarluutilinnut Danmarkimut inissinneqarsimasunut 491 millionit aningaasartuutigineqartut

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat