Nakkutilliisut: Sermersuumi meeqqat pisortanit sumiginnagaapput

Nuummi meeqqat ikiortariaqartut kommunimit sumiginnagaasimanerat nalunaarusiami ilaatigut inerniliunneqarpoq:

- Nakkutilliinermi suliat nalaatsornikkut toqqarneqartut ilarpassuisa ilungersunarluinnartuunerat, kommunillu suliamik ingerlatsinera aamma/imaluunniit ingerlatsisimannginnera pissutigalugu meeqqat pisortanit sumiginnagaasimasut paasineqarpoq.

Sumiginnaanerillu ilaat ima ilungersunarsimatigipput meeqqat kommunip akuleruffiginngisaanik inuunerminnik navianartorsiortitsisimallutik:

Pisortat sumiginnaanerisigut, kommunip ilisimasaanik meeqqat inuunerminnik navianartorsiortitsisimapput (navianartorsiorput)/inuunerat siunissami aserorneqarsinnaavoq, assersuutigalugu - timikkut sakkortuumik persuttagaanermikkut kinguaassiuutimikkullu kannguttaatsuliorfigineqarnermikkut - tamannalu kommunimit unitsinneqarsimanngilaq imaluunniit pimoorullugu unitsinniarneqarsimanani, taama isornartorsiuisoqarpoq.

Namminersorlutik Oqartussat immikkoortortami nakkutilliinerat Ittoqqortoormiini, Paamiuni Nuummilu ingerlanneqarpoq, Kommuneqarfik Sermersuullu meeqqat pillugit suliassaqarfimmi akisussaaffimminik aqutsinerata misissuiffiginissaanik siunertaqarluni. Nakkutilliineq pussutsit arlallit sakkortuumik isornartorsiorneqarnerannik kinguneqarpoq.

KNR.gl-ikkut, Radioaviisikkut Qanoruukkullu sisamanngornermi malinnaagit, pisoq ingerlaavartumik sammissavarput.