Sermersooq inunnik isumaginninnermut 40 millioninik aningaasaleeqqittoq

Meeqqanut inuusuttunullu angerlarsimaffiup avataanut inissinneqartunut, innarluutilinnullu 40 millioningajaat immikkut 2018-imut illuartillugit aningaasaliissutaanissaat, Kommuneqarfik Semersuumi kommunalbestyrelsimi ilaasortat marlunngornermi akuersissutigaat.
Kommuneqarfik Sermersooq inunnik isumaginninnermut 40 millionit koruuningajannik ilassutitut aningaasaliissuteqarpoq.
Allattoq Bikki P. Kleist
novembarip 23-at 2018 05:41

Meeqqammi avataanut inissinneqartartut amerliartortut, Uju Petersen oqarpoq:

- Taamatut Kommuneqarfik Sermersuumi pisariaqartitsisut ajoraluartumik amerliartortut malugisimavarput. Taamaasillutalu aamma politikkikkut siunnersuutigineqarpoq Paamiuni meeqqanik angerlarsimaffiup avataani inissiinissamut angerlarsimaffimmik pilersitsinissaq pillugu suliassaq taanna aamma tiguarput, Kommuneqarfik Sermersuumi meeqqanut ilaqutariinnullu ataatsimiiititaliami siulittaasoq, Inuit Ataqatigiinneersoq, Uju Petersen taama oqarpoq.

AAMMA ATUARUK Ulloq unnuarlu paaqqinnittarfiit Sermersuup ingerlatilerusukkai

Innuttaasunut innarluutilinnut aamma aningaasaliisoqartoq

Inuusuttuaqqat 18-ileereersimasut angerlarsimaffiup avataanut inissinneqarsimasut 15-it aningaasaliiffigineqarput.

Aamma meeqqat inuusuttuaqqallu innarluutillit ilaat immikkut inissiaqarfinniilertussat aningaasaliiffigineqarput.

AAMMA ATUARUK Innarluutilinnut Danmarkimut inissinneqarsimasunut 491 millionit aningaasartuutigineqartut

Meeqqat aningaasaliinerit qanoq malugissaneraat ulloqeqqaanerani Radioaviisimi apeqqutigaarput, Uju Petersenilu tassunga atatillugu ima oqarpoq:

- Soorlu oqartugut inuusuttunut innarluutilinnut Tuujummi najugaqarfissanut naleqqussarnissaat inissianut 15-inut pineqartunut ilaapput. Inissiat ukua naammassineqartussat naqqaniittut innarluutilinnut najugaqarfissaattut takorloorpagut, Kommuneqarfik Sermersuumi meeqqanut ilaqutariinnullu ataatsimiiititaliami siulittaasoq, Inuit Ataqatigiinneersoq Uju Petersen taama oqarpoq.

Kommuneqarfik Sermersuup Danmarkimi inuit innarluutillit najugaannut inersimasut inissitai 44-pput Kalaallillu Nunaanni inuit innarluutillit najugaannut inersimasut inissitai 39-ullutik.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk