Sermersuumi atuartut 1. klassimit tuluttut ilinniartinneqartalissasut

Allannguutissaq taanna ukiup atuarfiusup tulliani, tassa aggustimi atuutilissaaq, 1., 2., 3., klassenilu atuartut tuluttoortinneqartarneri sapaatit akunnerata ingerlanerani ataatsimik ilaneqassapput.

- Tuluttut ilinniartitsisalernissat fagit allat ilanngarneqarnerannit kinguneqarnavialaq, taamaattumik angajoqqaat tamanna annilaanngatigissanngilaat. Ilinniartitsisunik 4. klassini tuluttut ilinniartitsisartunik illoqarfinni nunaqarfinnilu tamani peqareermat, ilinniartitsisalerneq immikkut aningaasartuutaassanngilaq, Kommuneqarfik Sermersuup Meeqqanut Atuarfinnullu ataatsimiititaliaata siulittaasua Nivi Olsen (D) oqarpoq.

Nivi Olsenip tuluttoortitsinerusalernissaq nuannaarutigaa, ataatsimiititaliarlu malinnaalluassasoq erseqqissarlugu.

- Soqutigisaraarput meeqqat inuusuttuaqqallu nunani allani ajornartorsiuteqaratik tuluttut oqaluussisarnissaat, Nivi Olsen oqarpoq.

Kommunimi atuartut pitsaanerusumik atuartinneqartarnissaannik kommunalbestyrelsimi partiit suleqatigiit anguniagaqartut, tuluttullu 1. klassimit ilinniartitsisalernissat angunikkani piviusunngortitsinneqartut siullisut, kommunip nittartagaani allaaserineqarpoq.