Ilisimatooq: Tuluit oqaasiisa piorsarsimassuserput sunnissavaat
Qallunaat oqaasiinut taarsiullugit tuluit oqaasiisa pingaarnerit aappaattut meeqqat atuarfianni atuartitsissutigineqartalernissaat pillugu Inatsisartut oqallinnissaannik Vivian Mortzfeldt siunnersuuteqarpoq.
Tamannalu avaqqunneqarsinnaanngitsoq Ilisimatusarfimmi lektor phd-usoq, ilaatigut Københavns Universitetimi ilisimatusarsimasoq, Arnaq Grove isumaqarpoq.
- Tuluit oqaasii sutigut tamatigut silarsuarmi sallinngortitaapput, uagullu kalaallit allarpassuartulli pinngitsoorsinnaanngilagut, atuartitsinermi, ilinniartitsinermi universiteternermilu. Avatangiisigut ingerlaqatiginiarsarissagutsigit tuluttut aamma qaffassaanissarput pisariaqartipparput, Arnaq Grove KNR-imut oqarpoq, mianersortariaqartugulli oqaatigalugu.
Nunani avannarlerni tuluit oqaasiisa atugaaleraluttuinnarneri uppernarsarneqarnikuuvoq. Allaallumi inuusuttut marluinnik oqaasilittut isigineqaleraluttuinnarlutik, tassali ulluinnarni tusagassiuutinik atuinerminni tuluit oqaasii atungaaramikkit.
Aamma atuaruk Tillie Martinussen: Oqaatsit pillugit oqallinneq kusanaappallaaqaaq
Taamaammat tuluit oqaasii pissaanilissuummata mianersortariaqartugut, Arnaq Grove isumaqarpoq.
Ullutsinnimi kalaallisut oqaatsigut qallunaat oqaasiinik oqaasersianik akuugaaqaat, namminerlu oqaasiliornikkut angummassinnaanata. Oqaatsitta inissisimaneri ilaatigut nukittoorsuujunnaariartorlutillu naammiginartumik ineriartortinneqanngillat.
Qallunaat oqaasiinut taarsiullugit tuluit oqaasiisa pingaarnerit aappaattut meeqqat atuarfianni atuartitsissutigineqartalissappata ilumut piareersimanerluta immitsinnut aperisariaqartugut, Arnaq Grove isumaqarpoq.
Taassuma oqaatigaa tuluit oqaasiisa atorneqarnerulernerisigut eqqarsartaatsimik kulturinillu “oqitsunik” (populærkultur, aaqq.) nassataqarumaartut, kalaallit oqaatsitsinnik kulturitsinnillu sunniiumaartunik.
Tassami kalaallisut oqaatsigut inatsisitigut sallersaagaluartut ulluinnarni qallunaat oqaasiinit sunnersimaneqarnerat annertusoq isumaqarami.
- Apeqquterujussuaq tassaavoq oqaatsitta kulturittalu sunnertipilooriartornissaat, sutigut tamatigut pisussaq artussannginneraat. Oqaatsivut massakkut ima nukittutigippat sunniinerujussuarmik artugaqassanatik? imaluunniit massakkut sanngiinnerusutut inissisimanerat eqqarsaatigilluarneqarsimava?, Arnaq Grove KNR-imut oqarpoq.
Oqaatsigut salliunneqartariaqartut
Tuluttut qallunaatullu oqaatsit siuarsarneqarnissaat eqqartorneqarajuttarpoq. Kalaallisulli oqaatsitta siuarsarneqarnissaasa immikkut iliuuseqarfiginissaat puigorneqartartoq, Arnaq Grove isumaqarpoq.
Tassamigooq ulluinnarni oqaasersianik atuinerput annertuvoq annertusiartorlunilu, illuatungaanilu oqaasiliornerput malinnaasinnaanani.
Ullutsinnilu kalaallit ilarpassui oqaaseqatigiiliortaatsitsinnik nalorsartunngornikuusut Grovep oqaatigaa.
- Tuluttut oqaatsit pissaanilissuummata namminerisamik oqaatsitta qanoq inissisimaneri qiviaqqaartariaqarluinnarpagut. Oqaaseqqaatitigut sanngiikkutta pisariaqarpoq nammineq oqaatsitta siuarsarnissaat. Pissusissamisoorpormi oqassalluni oqaatsit suulluunniit atorneqarnermikkut allanngoriartortarput, taamaattumillu pitsanngorsagaajuarnissaat pisariaqarsorilluinnarpara, Arnaq Grove oqarpoq.
