Tillie Martinussen: Oqaatsit pillugit oqallinneq kusanaappallaaqaaq

Ilinniartitaanermut naalakkersuisup Nivi Olsenip, Demokraatineersup, § 37 naapertorlugu apeqquteqaammut akissuteqarluni oqaatigaa Naalakkersuisut allannguutissatut siunnersuummik aappaagu ukiaanerani ataatsimiinnermi pilersaarutigigaat, siunnersuullu taanna danskit oqaasiinut taarsiullugit tuluit oqaasiisa pingaarnerit aappaattut meeqqat atuarfianni 2018-imi aggustip qaammataanit atuartitsissutigineqartalernissaannik imaqassasoq.

Taamatulli nalunaaruteqarnera Nivi Olsenip parteeqataata Justus Hansenip, Demokraatit Inatsisartuni politikkikkut oqaaseqartartuata, paasiuminaatsippaa, isumaqarami 'danskit tuluillu oqaasii naligiissinneqartariaqaraluartut'.

Læs også Tuluit oqaasii takornartat oqaatsini sallersaalissanersut Inatsisartut oqallisigileraat

Parteeqataalu alla oqaatsit pillugit oqallinnermut akuliuppoq. Tillie Martinussen oqallinnermi piviusorsiortoqarnissaanik ujartuivoq.

- Meeqqat atuarfiat sumiiffinni amerlasuuni ilungersunartorsiorpoq aamma meerartagut inuusuttagullu kalaallisut ilinniartissinnaanngilagulluunniit allat allamiut oqaasiinik qaffasissumik ilinniarsinnaalersillugit, Tillie Martinussen tusagassiorfinnut nalunaaruteqarluni taama allappoq.

Taanna aamma isumaqarpoq tuluit oqaasii pingaarnerusumik atorneqaleraluarparta danskit oqaasii siunissami aamma pisariaqartinneqassasut.

Oqallinneq sakkortooq

Tillie Martinussenip danskit oqaasiisa oqallisigineqarnerini oqallinnerup sakkortusarnera aamma sakkortuumik isornartorsiorpaa.

- Oqallisingaatsiartoqalersorlu atuarsinnaasarpakka asissuineq, nikanarsaaneq aamma kanngusaarineq. Tamanna pissuserissaarnerunngilaq. Allaanngilaq danskiusut suugaluartulluunniit nikanarsarnissaat ajunngitsoq , kisianni - inoqatigut qanoq sunnerneqartarpat aamma qitornagut - taamatut oqallisillaraangatta?, Tillie Martinussen taama aperivoq imalu kajumissaaruteqarluni:

- Asissuilluni oqallinneq unitsittariaqarparput - itsarnisanit sinneruttuuvoq. Taarseriartigut ataqqinninnermik, akuersaarnermik alapernaannermillu. Ikinngutigeeriarta tamatta immitsinnut inissaqartilluta. Taamaasippat meerartagut iluaqusissavagut. Aamma immitsinnut.

Apeqquteqaat aallaavigalugu oqallinneq novembarip arfineq-aappaani pissaaq.