Sermersooq Danmarkimi kommuninit marlunnit akiliisussanngortinneqarnerminut eqqartuussivilersuinermi ajugaasoq

Danmarkimi kommunit marluk Kommuneqarfik Sermersuumut millionilikkaanik akiliisussanngortinneqarput. Kalaallit eqqarsartaatsimikkut innarluutillit Danmarkimi paarineqartillutik nutaamik pinerluuteqaqqissimasut paarineqarnerannut atatillugu aningaasartuutit matumani pineqarput. Vestre Landsret ullumi tallimanngornermi taama aalajangiivoq.

Allattoq Helle Nørrelund Sørensen

marsip 24-at 2023 09:12

Danmarkimi kommunit marluk Kommuneqarfik Sermersuumut millionilikkaanik akiliisussanngortinneqarput.

Danmarkimi Vestre Landsret ullumi tallimanngornermi taama aalajangiivoq.

Kommuneqarfik Sermersuup suliani marlunni Danmarkimi kommuninit marlunnit akiliisussanngortinneqarnera pineqarpoq. Kalaallit eqqarsartaatsimikkut innarluutillit marluk Danmarkimi kommunini marlunni taakkunani paarineqarnermi nalaani pinerluuteqaqqissimaneranni aningaasartuutit pineqarlutik.

Aamma atuarukKalaallit eqqarsartaatsikkut innarluutillit pinerlussimasut paarineqarnerat akilerumaneqanngilaq

Randers aamma Lolland isumaqarput, kalaallit Danmarkimiitsillutik pinerluuteqaqqinnerminni paarineqarnerannut atatilllugu aningaasartuutit Kalaallit Nunaanni kommunerisaat akiliisariaqartut.

Vestre Landsretili allatut maanna aalajangiivoq.

Taamaammat Randers aamma Lolland Kommune katillugit 5,2 millionit koruuninik taakkualu erniaannik, millionit affaasa missaannik, Kommuneqarfik Sermersuumut akiliisussanngortinneqarput.

Borgmesteri: Iternga tikillugu akiuutissaagut

Ukiuni arlaqartuni suliaasoq taanna Naalagaaffeqatigiinni pinerluttuliorsimallutik inissiisarfimmiittussanngortinneqarnerannut kikkut akiliisussaanerannut tunngasuuvoq.

Vestre Landsret suliani marlunni aalajangiivoq:

- Suliap aappaa kalaallimut Rødbyhavnimi Lollandimiittumi Kofoedsmindemi paarineqartumut tunngasuuvoq. Eqqarsarsartaatsimikkut kinguarsimasut pinerlussimasut tamaani Region Sjællandimitt pigineqarlunilu ingerlanneqartumi paarineqartarput.

- Suliallu aappaa kalaallimut allamut Randers Kommunemi aamma paarineqartumut tunngasuuvoq.

Suliat taakku kalaallinut Kommuneqarfik Sermersuumi pinerluuteqarsimasutut pineqaatissinneqarsimasunut tunngasuupput. Nunarpulli eqqarsartaatsimikkut innarluutilinnut pinerluuteqarsimasunut inissiisarfeqanngimmat, Kommuneqarfik Sermersooq kalaallit taakku marluk Danmarkimi paarineqarnerannut akiliisarpoq.

Kalaallit eqqarsartaatsimikkut kinguarsimasut Danmarkimi kommunit ilaanni najugalittut nalunaarsoqqallutik paarineqartut pinerloqqinnertik pissutigalugu pillagaaqqittut paarineqarnerisa Danmarkimi kommunerisaannit akilerneqartassasut, Ankestyrelsen inerniliivoq.

Allisiguk

Danmarkimi Naammagittaalliuteqartarfiup kalaallit eqqarsartaatsimikkut kinguarsimasut danskit inissiisarfiiniinneranni nutaamik pinerluuteqaqqinneranni nunatta akiligassanut pisussaatinneqannginnissaa 2019-imi aalajangernikuuaa.

Vestre Landsretimilu ullumi tallimanngornermi aalajangiineq tassunga tapersiineruvoq.

Aamma atuarukNaalagaaffeqatigiit kinguarsimasunut pinerluuteqarsimasunut tunngatillugu akiligassat avittariaqaraat

Suliami tassani akiliisussanngortitaassagunik iternga tikillugu akiuunniarlutik, Lolland Kommunep borgmesteriata Holger Schou Rasmussen arlaleriarluni erseqqissaatigisareerpaa. Eqqartuussiviillu qullersaanni ajorsassagaluarunik ajornanngippat ministerimut anngunniarlugu aamma erseqqissaatigaa.

Taanna KNR-imut januaarimi ima oqarpoq:

- Iternga tikillugu akiuunniarpugut. Eqqartuussiviillu qullersaanni ajorsassagaluarutta, akiliisussanngortitaanitsinnik akuersiinnarnaviannginnerput ministerimut anngutissavarput.