Myanmarimi inuiattut ullorsiortoqarnerani parnaarussat tuusintilikkuutaat iperagaasut

Parnaarussat 5864-it - taakkunannga nunanit allaneersut 180-it - Myanmarip kiffaanngissuseqalerneranit inuiattut ullorsiornerani iperagaapput.

Myanmarimi naalagaaffiup nutaarsiassaqartitsivii arlallit taama ilisimatitsipput.

Parnaarussat ilaat Myanmarimi inuiattut ullorsiortoqarneranut atatillugu siusinnerusukkut iperagaanikuupput.

Myanmarimi sakkutuut nunami tassani naalakkersuisut 2021-mi uppisippaat, sukannersumik aqutsilerput nunamilu tassani kingorna eqqissiviilliortoqalerluni.

Sakkutuut pissaanermik Myanmarimi tigusimmatali akerliussutsimik takutitsinerit imaaginnavipput, akerliussutsimillu takutitsisut sakkutuunit sakkortuuliorfigineqartarlutik.

Myanmarimi ukioq manna qinersisoqarnissaa sakkutuut neriorsuutiginikuuaat. Qinersinissamili naapertuilluanngitsuliortoqarnissaa Myanmarimi illuatungiliuttut aarleqqutigaat.

Nobelip eqqissinermut nersornaasiuttagaanik tunineqarnikoq parnaarussaaqqasoq

79-inik ukiulik Aung Suu Kyi, Nobelip eqqissinermut nersornaasiuttagaanik siornatigut tunineqarnikoq, parnaarussanut ilaavoq.

Taanna pinerluutini assigiinngitsuni 14-ini pisuutinneqarluni ukiuni 27-ni parnaarussassanngortinneqarnikuuvoq.

Myanmarimi sakkutuunut illuatungiliuttut nuimanersaasa parnaarussaanissaa pillugu asuliinnaq eqqartuussisoqartoq nunat killiit arlallit isumaqarput.

Aung San Suu Kyi Myanmarimi naalakkersuinikkut siornatigut siuttuuvoq, Myanmarimi 2015-imi 2020-milu qinersisoqarnerani ajugaalluarluni.

Suu Kyi nunami allami innuttaassuseqartoq meeraqarfigimmagu nunap taassuma tunngaviusumik inatsisaa naapertorlugu nunami tassani præsidentinngorsinnaanngilaq.

Naak naalakkersuinikkut siuttuugaluarluni præsidentimut maleruutiinnartutut inissisimalluni siunnersortitut inissisimagaluarpoq.

Sakkutuut Aung San Suu Kyi naalakkersuisoqatigiivilu 2021-mi februaarimi uppisimmatigit sakkutuut taamanikkut oqaatigaat 2020-mi qinersinermi peqquserluttuliortoqarsimasoq, Aung San Suu Kyi qinersinermi taamanikkut ajugaarujussuarpoq

Qinersinermi peqquserluttuliortoqarneranik pasilliutit nunat tamalaat qinersinermik nakkutilliisuisa Myanmarillu qinersinermut ataatsimiititaliaata ilumuunnginnerpai.

Myanmar Burmamik siornatigut taaguuteqarpoq, 1989-imi Myanmarinngorluni. 54 millionit missaannik innuttaqarpoq.

/ritzau/Reuters