Ikiorsiissutit 10 millionit koruunit nunatta kujataanut

Kujataani takornarialerinermik inuussutissarsiortut siorna januarimit septembarip qaammataanut takornarialeriniarnerminni ajornartorsiortut nuannaarutissaqalerput.

Taakkua sikorsuaqarnerata malitsigisaanik takornariartitsinermik inuussutissarsiorsinnaanerat piffissami tassani ajornakusoormat, Naalakkersuisut ikiorseerusullutik Inatsisartut aningaasaqarnermut akileraartarnermullu ataatsimiitsitaliaannut qinnuteqarput.

Ataatsimiitsitaliami amerlanerussutillit qinnuteqaat 10 millionit koruuninik aningaasartalik ukioq naalersoq, tassa decembarip 30-anni akueraat. Tamanna qinnuteqartup, tassa inuussutissarsiornermut naalakkersuisup oqiliallaatigaa.

- Naggataatigut suliaq kissaatigisamik inerneqarmat tuallappunga. Naalakkersuisut isumaqartuarsimapput kujataani ingerlatsisut eqqugaasut ikiorneqarnissaminnik pisariaqartitsisut, Naaja H. Nathanielsen tusagassiorfinnut nalunaarpoq.

Ataatsimiitsitaliami eqqissiviilliorneq

Suliap suliarinera sivikinngilaq. Naalakkersuisormi akisussaasoq siorna oktobarip qaammataani ikiorsiinissaq pillugu qinnuteqarnermini ataatsimiitsitalimit itigartinneqarpoq.

Qinnuteqaammi siulleq tukattutut ataatsimiititaliami ilaasortanit arlalinnit taamani nalilerneqarpoq.

Ataatsimiititalimi ilaasortat ilaat siulittaasortik, Peter Olsen, atuuffimminit tunuassasoq taamani aamma kissaateqaraluarput. Ataatsimiitsitaliammi ataatsimiinnerani isertortumi qanoq isumaqartigiinniartoqarsimanera pillugu oqaaseqarnera iluarinngeqaat.

Peter Olsenili siulittaasuuginnarpoq. Taanna utoqqatserluni tusagassiorfinnut taamani nalunaarpoq:

- Pisut ilinniarfigaakka utoqqatserpungalu ataatsimiititaliami sulinermut tamanna aalassassimaarutaalluni pimmat.

Kaaviiaartitat aallaaviussasut

Suliffeqarfik ikiorserneqassaguni 2024-mi januaarimit septembarip tungaanut kaaviiaartitat 2023-mi piffissamut tassunga sanilliullugit minnerpaamik 20%-inik ikinnerussapput. Takornarialerisulli nutaajunerit tamarmik immikkut naliliiffigineqassasut, inuussutissarsiornermut naalakkersuisoqarfik allappoq.

Nalik Ventures A/S Innovation South Greenland suleqatigalugu ikiorsiissutinik qinnuteqartunik sullississapput.