Suliffeqarfik ikiorsiinngitsoorneq pillugu: Politikki ikiorsiinissamut aporfiuteqinagu

Takornarialerisunut ikiorsiissuteqarnissamik neriorsuutigineqaraluartoq, sapaatit akunnialuit matuma siorna itigartinneqarpoq.

Tamannali Aningaasaqarnermut Akileraartarnermullu Ataatsimiititaliami ilaasortat akornanni politikkikkut immeraanninnguummat, suliaq  puigorneqarsimarataannaavoq, 

Innovation South Greenlandillu pisortaata, Miki Jensenip, tamanna uggoraa:

- Una ajornartorsiut pineqarunnaarluni politikkikkut oqallinninngortoq isigalugu ajuusaarnarpoq.

- Politikkikkut kina oqarsimava, kina oqarsimannginnersoq, tassunga saatsinneqartoq. Isumaqarpunga ajornartorsiut una qanoq aaqqinneqarsinnaanersoq eqqartoqqinneqartariaqartoq, taanna oqarpoq.

Siunissamut eqqasunneq

Suliffeqarfiup, Miki Jensenip aggerfiata, Kommune Kujalleq suleqatigalugu kujataani inuussutissarsiorneq, takornarialerineq aallarnisaanerlu siuarsarniarsaraa.

Politikkerinilli tapersersorneqanngikkaanni tamanna ajornakusoorsinnaavoq.

Nunap ilaani aningaasatigut ajornartorsiorfioreersumut tamanna kinguneqapilussinnaavoq:

- Una ajornartorsiorneq naleqarsinnaaqaaq. Suliffeqarfiit annaaneqarsinnaapput, aamma ukua takornarialerisut ataasiakkaat matoriasaarnissaat kingunerisinnaavaa. Taamaattumik iliuuseqartoqarnissaa pingaaruteqarluinnarpoq, Miki Jensen oqarpoq.

- Kujataamiunik, ilungersoreertunik ineriartulersitsinissamullu nukinnik sumi tamaniit pisariaqartitsisunik, eqqasuttoqaqaaq. 

Ikiorsiinissaq qularutaasimanngikkaluartoq

Kujataani takornarialerisut ikiorserneqarnissaannik qinnuteqaat oktoberip qiteqqunnerani ataatsimiitsitaliamit itigartinneqarmat amerlasuut tupaallaatigaat.

Qinnuteqaasiortoq Niuernermut Naalakkersuisoq, Naaja Nathanielsen tupaallannerpaavoq:

- Taamaattumik siunnersuutima naalakkersuisunit suliarineqareerluni akuerineqareersup naalakkersuisoqatigiillu kissaatigisaattut ataatsimiititaliamut ingerlateqqinneqarpat, taava siunnersuutima aamma amerlanerussuteqartunit akuerineqarnissaa naatsorsuutigaara, taanna taamani oqarpoq.   

Kujataani takornarialerisut ikiorsiissut amigaatigeqisartik pissagaat Miki Jensenip Naaja Nathanielsenitulli naatsorsuutigigaluarpaa:

- Tupannaqaaq. Naatsorsuutiginikuugaluarparput una siunnersuut akuerineqassasoq. Naalakkersuisut, Kommune Kujalleq susassaqartullu taakkua ataatsimeeqatiginikuullugit oqariartuut taannaammat, taanna oqarpoq.

Inuiaqatigiinnut kinguneqarujussinnaavoq

Ajornartorsiummut aaqqiissuteqartoqanngippat, takornarialerisunuinnaanngitsoq - tassa inuiaqatigiinnut tamanut kinguneqapilussinnaasoq Miki Jensen oqarpoq:

- Politikkikkut oqariartuutaavoq takornarialerineq ineriartortinneqassasoq, massakkut mittarfiit naammassilerput. Takornarissat amerliartuinnarput.

- Ukiumiik ukiumut aaqqinneqarsinnaanngitsumik, qaqeqqissagutta sivisusinnaavoq. Taamaattumik una immikkut isigineqarnissaa pingaarluinnarpoq, Miki Jensen oqarpoq.

Taamaattumillu politikerit suliaq unitsiinnarnagu iliuuseqassasut Innovation South Greenlandimi pisortaq neriuppoq.

- Oqariartuutiginiarparput aaqqiissutissamik ujaarlertoqartariaqartoq. Massakkut inissisimaffik naammaginanngilaq. Minnerpaamik utaqqiisaagallartumik akileraarnissamut utaqqigallarsinnaaneq aaqqiissutitut siunnersuutigisinnaavarput. Taava immaqa aaqqiissutit allat eqqartorneqarsinnaallutik. Taanna Inatsisartunut kaammattuutiginiarpara, Miki Jensen naggasiivoq.