USA-mi nunap ilarujussuani perlunnissaa USA-mi silasiortut mianersoqqussutigigaat
USA-p kangisissuani piffissami aggersumi issingaatsiarlunilu silapilunnissaa aarlerisaarutigineqarpoq.
USA-mi silasiortut National Weather Servicemeersut (NWS) ippassaq arfininngornermi unnukkut taama mianersoqqussuteqarput.
Ukiuunerani silapilunnertut National Weather Servicep taavaa, USA-llu kangisissuani innuttaasut akornanni 60 millioninit amerlanerusut silapilunneranit eqqorneqarsinnaapput.
Perlullunilu issingaatsiarnissaa ilaatigut aarlerisaarutigineqarpoq.
USA-p qiterpasissuani naalagaaffimmit Kansasimit USA-p kangimut sineriaani naalagaaffinnut Marylandimut, Delawaremut Virginiamullu silapilunnissaa aarlerisaarutigineqarpoq. Tassa 2400 kilometeritut isorartutigisumi silapilunnissaa aarlerisaarutigineqarpoq. Nutaarsiassaqartitsivik AFP taama allaaserisaqarpoq.
- Sialuk serminnguuttoq nittaalangaatsiarnissaalu pissutaallutik sumiiffiit silapilunneranit eqqorneqartussani angallanneq eqqorneqassaaq, silasiortut allapput.
Naalagaaaffinni arlalinni 38 centimeterinik apinissaa ilimasaarutigineqartoq
USA-mi sumiiffiit ilaanni ukiuni qulikkuutaani arlalinni apisartigineratut 2025-p aallartisimalaarnerani apissasoq National Weather Servicep aarlerisaarutigaa.
- Kansasip avannamut kangisissuanit naalagaaffiup Missourip avannarpasissuata tungaanut 38 centimeterinik apinissaa aarlerisaarutigineqarpoq, tamaanilu ukiuni qulikkuutaani arlalinni aatsaat taama apitigissalluni, NWS allappoq.
USA-p illoqarfiisa pingaarnersaanni Washington D.C.-mi 13 aamma 25 centimeterit akornanni apitiginissaa aamma ilimasaarutaavoq.
Issingaatsiassaaq - sumiiffiit ilaanni minus 18-inik ississangatinneqarluni, sakkortuumillu anorlertussaanera eqqarsaatigalugu pissutsit ajornerulersinnaanerat silasiortut aarlerisaarutigaat.
Missourimi Virginiamilu upalungaarsimatitat piareersimatinneqassasut naalagaafffinni taakkunani guvernørit nalunaarutigaat.
Guvernørit taakku naalagaaffinni pineqartuni silarlunnissaa inoqatinut attaveqaqatigiittarfinni mianersoqqussutigereerpaat.
Naalagaaffiup Kentuckyp guvernøria Andy Beshear sila pillugu aamma oqaaseqarpoq.
Qaqqani Appalacherini ilaatigut Kentuckymiittut angallanneq ajornakusoorsinnaasoq taassuma oqaatigaa.
Tamaani decembarip ingerlanerani anorersuarlunilu kaassaarpoq, illoqarfeeqqani arlalinni aseruatitertoqarluni, issinnissaanullu tamanna aamma ajornakusoortitsilerluni.
Attaveqaasersuutit assigiinngitsut eqqorneqarnissaat ilimanartoq guvernørip oqaatigaa, aqqusinikkut angallanneq ulorianarsisinnaalluni innaallagissamillu pilersuineq aamma eqqorneqarsinnaalluni, guvernøri ataatsimiinnermi ilaatigut oqarpoq.
/ritzau/
