Biden nittaalartalimmik anorersuartumut New Yorkimut ikiuisoq

Amerikamiut præsidentiat naalagaaffimmut naalagaaffeqatigiinni ilaasumut New Yorkimut nittaalartalimmik anorersuartumut naalagaaffimmut tapersiissuteqarpoq.

Nutaarsiassaqartitsivit Reuters taama allaaserisaqarpoq.

Tamanna naalagaaffeqatigiinnut ilaasumi nittaalartalimmik anorersuarnerani innuttaasut isumannaannissaannik suliniutigineqartunut ikiuutaassaaq.

Silapilunnerani illoqarfiup Buffalop qanittuani inuit 27-t toqunerannik maanna kinguneqareerpoq.

Toqungasut ilaat apummi imaluunniit biilini nassaarineqarput. Ilaat aputaajaatillutik uppiinnarsimapput.

Assoroortitsivallaarnikkut aputaajaaneq – uummammik unittoornermik qitimillu ajoqusernermik kinguneqarsinnaanera pillugu aamma mianersoqqussuteqartoqarpoq.

Innuttaasut tusindilikkaat innaallagiaqanngitsut, præsidentip illorsua paasissutissiivoq.

Ukiuni 50-ini aatsaat taama nittaalartalimmik anorersuartigisoq

Buffalomi innuttaasut millionit sisamararterutaasa missaraat. Buffalo naalagaaffiup naalagaaffeqatigiinnut ilaasup New Yorkip illoqarfiisa annerpaat tulleraa.

Guvernør Kathy Hochul ataasinngormat tikeraarpoq. Taassumalu “ukiuni hundereikkuutaani nittaalartalimmik anorersuarnerata” Buffalo eqqorsimagaa oqaatigaa.

Tamatumalu “qaangiunneranik oqarnissaq siusippallaartoq” ilanngullugu oqaatigaa.

Silarlunnera nuna tamakkerlugu inuit 100-t affaasa missaat toqupput.

AAMMA ATUARUK Nunavummi nunaqarfik Kangertugaapik ajornartoorfiusutut nalunaarutigineqartoq

Amerikamiut aviisiata, The New York Timesip oqarnera naapertorlugu sumiiffiit ilaanni aput 125 centimeterit missaanniippoq, sulilu apigaluttuinnarluni.

Nittaalartalimmik anorersuarnera decembarip ulluisa 23-anni aallartippoq.

Aviisillu ukiuni 50-ini aatsaat taama sakkortutigisumik nittaalartalimmik anorersuartoq aamma allaaseraa.

Naalagaaffiup kippasissortaani aqqusinerpassuit apinera pissutigalugu aqqutissaanngillat.

Naak inuit biilinik ingerlanissaannut inerteqquteqartoqareeraluartoq biilertartut hundredilikkuutaat oqartussanit sapaatip akunnerata naanerani annaanniarneqartariaqarsimapput. Inerteqquteqarneq ataasinngornermi suli atuuppoq.