Kalaallit eqqarsartaatsikkut innarluutillit pinerlussimasut paarineqarnerat akilerumaneqanngilaq

Kalaallip eqqarsartaatsimigut kinguarsimasup Danmarkimi paarineqarnermini pinerloqqissimasup paarineqarneranut akiligassat, Lolland Kommunep akilerumanngilai. Tamanna Vestre Landsrettimi suliarineqartussanngorpoq.
Lolland Kommunep borgmesteria, Holger Schou Rasmussen (S), kalaallip eqqarsartaatsimigut kinguarsimasup kommuneminni najugallip paarineqarneranut akiligassanut tunngatillugu eqqartuussivimmi sassarnissaminut piareersimavoq. Assi © : Lolland Kommune
januaarip 16-at 2023 07:21
Nutserisoq Hanne Petersen

Kalaaleq eqqarsartaatsimigut kinguarsimasoq Kalaallit Nunaanni pineqaatissinneqareerluni Danmarkimi paarineqartilluni pinerloqqissimasoq, danskit kommuniata aningaasartuuteqarfigisussaanngilaa.

Lolland Kommunep borgmesteria, Holger Schou Rasmussen (S), taama isumaqarpoq.

- Innuttaasormi Lollandimi najugaqarsimanngisaannarmat tamaanilumi inunngoranilu peroriartunngimmat aningaasartuuteqarfigisussaanngissorivarput. Taamaammat inuup taassuma paarineqarneranut akiligassat akilerusunngilagut.

AAMMA ATUARUK Naalagaaffeqatigiit kinguarsimasunut pinerluuteqarsimasunut tunngatillugu akiligassat avittariaqaraat

Kalaaleq taanna Rødbyhavnimi Lollandimiittumi Kofoedsmindemi paarineqarpoq. Eqqarsarsartaatsimikkut kinguarsimasut pinerlussimasut tamaani paarineqartarput.

Kalaallip taassuma, Kommuneqarfik Sermersuumeersuusup, Kofoedsmindemi paarineqarnera Kommuneqarfik Sermersuup siullermik akilertarpaa. Kalaalerli taanna paarineqartilluni pinerloqqimmat, Lolland Kommune akiliisalertussanngortitaavoq.

Kalaallimullu tassunga akiligassat 12 millionit koruuniusut, Lolland Kommunep Kommuneqarfik Sermersuullu akilerumanngilaat.

Taamaammat Kommuneqarfik Sermersuup Lolland Kommune Vestre Landsrettimut suliassanngortippaa, tamannalu januaarip 25-ata 27-atalu akornanni pissaaq.

Kalaallillu allap paarineqarnera pillugu eqqartuussivilersuussinemi Randers Kommune aamma ilaavoq.

Akiligassat nunatta Danmarkillu saqitsaatigigaat

Naalagaaffeqatigiinni sanngiinnersat kikkunnit paarineqartassanersut paarineqarnerallu kikkunnit akilerneqartassanersoq aamma saqitsaassutaavoq.

Kalaallimmi eqqarsartaatsimigut kinguarsimasup taassuma Kofoedsmindemi paarineqarnera nunatsinni pineqaatissinneqaqqaarsimanera peqqutaalluni Kommuneqarfik Sermersuup siullermik akilertarpaa.

Lolland Kommuneli kalaallip taassuma paarineqartilluni pinerloqqinnini pillugu Danmarkimi pillarneqarnerata kingorna akiliisalertussanngortitaavoq. Kalaalermi taanna Lolland Kommunep tassani najugalittut nalunaarsoqqammat paaqqutarinissaanut akisussaasuusoq, aamma naak Kofoedsminde Lolland Kommunemit pinnani Region Sjællandimitt pigineqarlunilu ingerlanneqaraluartoq, oqartussat isumaqarput.

Lolland Kommuneli kalaallip taassuma paarineqarneranut 12 millionit koruuniusunik akiliisinnaajumalluni, soorlu meeqqerivinni utoqqarnillu isumaginninnermi sipaaruteqartariaqassasoq, borgmesteri Holger Schou Rasmussen oqarpoq.

-  Kalaallip taassuma paarineqarneranut sunniuteqarnikuunngilagut. Avataaneersumullu tunngasumik akiligassinneqarnerput akileraartartutsinnut sunniuteqanngitsoornavianngilaq, taanna oqarpoq. 

Danskerli Kofoedsmindemi paarineqartilluni pinerlulluni pillarneqarpat, taassuma paarineqarnera kommunerisaata pinngitsoornani akilertussaavaa.

Akiligassat Danmarkip Kalaallit Nunaatalu avittariaqaraluaraat

Sanngiinnersanik ikiuinermi, aamma taakku pillugit aningaasartuutinut tunngasuni, Naalagaaffeqatigiit tunngaviatigut suleqatigiittussaanerisa inatsisitigut aalajangersagaanera, Lollandip borgmesteriata taperserpaa.

Danmarkimili kommunit ataasiakkaat akiliisussanngortitaasussaanngitsut, taanna isumaqarpoq.

Akiligassammi Naalagaaffiup Namminersorlutik Oqartussallu avittariaqaraluaraat, taanna isumaqarpoq.

AAMMA ATUARUK Tusagassiuutit: Sermersuup danskit kommunii aningaasartuutit pillugit eqqartuussivilersuukkai

- Naalagaaffeqatigiit tamatumani suleqatigiittariaqarput. Taamaammat akiligassat taamaattut kikkunnit akilerneqartassanersut naalakkersuisutta kalaallillu naalakkersuisuisa isumaqatigiissutigisariaqaraluarpaat, Holger Schou Rasmussen oqarpoq.

Lolland Kommuneli eqqartuussivimmi sassartitaanermini ajorsarataannaavoq. 

Danmarkimi Naammagittaalliuuteqartarfik, Ankesyrelsen, suua?

Danmarkimi naammagittaalliuuteqartarfik, Ankestyrelsen, isumaginninnermut utoqqarnullu ministereqarfiup ataanniittoq arlaannaannulluunniit pituttorsimanngilaq.

Isumaginninnermut tunngasuni sulianilu aaqqiagiinngittoqarnerani, assersuutigalugu Danmarkimi kommunit ilaat, nunap immikkoortuisa ilaat oqartussaasulluunniit allat inatsimmut tunngasuni isumaqatigiinnginneranni sulianiluunniit aalajangersimasuni qanoq iliuuseqarnissamik nalorniffiusuni qanoq inerniliisoqarnissaanik aalajangiisuusarpoq. 

Ankestyrelsenili eqqartuussiviunngilaq. Taamaammat qanoq inerniliisoqarnissaanik aalajangiisimagaluarpalluunniit, eqqartuussivimmut sassartitsisoqarsinnaavoq.

Kalaallit eqqarsartaatsimikkut kinguarsimasut Danmarkimi kommunit ilaanni najugalittut nalunaarsoqqallutik paarineqartut pinerloqqinnertik pissutigalugu pillagaaqqittut paarineqarnerisa Danmarkimi kommunerisaannit akilerneqartassasut, Ankestyrelsen 2019-imi suliami inerniliivoq.

Borgmesterili Holger Schou Rasmussen inerniliussamik taassuminnga maleruaalersaanngilaq.

- Kalaallip taassuma paarineqarneranut akiliisussanngortitaasorinnginnatta akileerusunngi-lagut, taanna oqarpoq.

Vestre Landsrettimilu ajorsassagunik, tamanna eqqartuussiviit qullersaannut suliareqqitassanngortinniarpaat.

- Iternga tikillugu akiuunniarpugut. Eqqartuussiviillu qullersaanni ajorsassagaluarutta, akiliisussanngortitaanitsinnik akuersiinnarnaviannginnerput ministerimut anngutissavarput.

Kommuneqarfik Sermersoq tamanna pillugu oqaaseqartinniarsimagaluarparput, suliarli pillugu aalajangiisoqartinnagu oqaaseqarumanngilaq.

Aamma Randers Kommune Kommuneqarfik Sermersuumit suliami tassani eqqartuussivilersuunniarneqartoq oqaaseqarusunngilaq.