Naalagaaffeqatigiit kinguarsimasunut pinerluuteqarsimasunut tunngatillugu akiligassat avittariaqaraat
![](/sites/default/files/styles/image_934x467/public/article_images/holger_schou_rasmussen.jpg?h=91a2e54f&itok=XSPzL1Tw)
Danmarkimi Lollandimi akileraartartut kommunip Kalaallit Nunaannit ineriartornikkut kigaaqutillit pinerluuteqarsimasut inissinneqarsimanerannut akiliisariaqarnissaat pissutigalugu kommunimi utoqqarnik paaqqutarinninnissamut meeqqerivinniluunniit aningaasassaqannginnerunissaq naapertuutinngilaq.
Lollandip Kommuniani borgmesteri, Holger Schou Rasmussen Socialdemokraatineersoq taama isumaqarpoq.
- Kalaallit kommuniisa akiliinissaat uannut apeqqutaanngilaq. Lollandip Kommuniata akiliinnginnissaa uannut apeqqutaavoq, Lollandimi borgmesteri KNR-imut oqarpoq.
Suliaq nunatta innuttaasunik ineriartornikkut kinguarsimasunik pinerluuteqarsimasunik Danmarkimut immikkut ittumik inissiisarfimmut nassiussisarneranut tunngassuteqarpoq.
Taakkuli Danmarkimi immikkut ittumik inissiisarfimmi najugaqarnerminni – imaluunniit inissisimaffimmit anisinnaatitaanermi nalaani nutaamik pinerluuteqaqqikkunik inissiisarfimmiittussanngortinneqaqqinnerat danskit kommuniata inissiisarfiup sumiiffigisaata tamanna akilertussaavaa.
Tamannalu danskit kommuniisa ilorrisimaarutiginngilaat.
Danmarkimili Naammagittaalliuteqartarfiup kalaallit eqqarsartaatsimikkut kinguarsimasut danskit inissiisarfiiniinneranni nutaamik pinerluuteqaqqinneranni nunatta akiligassanut pisussaatinneqannginnissaa 2019-imi aalajangernikuuaa.
Tamanna pisumi ataatsimi kalaallisut innuttaassusillip Lollandip Kommuniani illoqaffimmi Rødbyhavnimi Kofoedsmindemiinnermini nutaamik pinerluuteqaqqinnera kommunimut 8 millionit koruuninik akiligassaqarfiulerpoq.
Akiligassaq taanna aallaqqaammut Kommuneqarfik Sermersuumut nassiunneqarpoq. Naammagittaalliuteqartarfiullu aalajangiinerata kingunerisaanik taanna Lollandip Kommunianut nassiunneqaqqippoq, tamannali suli akilerneqanngilaq.
Taamaammallu Lollandip Kommunia – Randersip Kommunialu Kommuneqarfik Sermersuumit eqqartuussivimmut suliassanngortinneqarput.
Lollandimimi Kommune innuttaasoq Kommuneqarfik Sermersuumeersuugaluartoq aamma Lollandip Kommuniata Kofoedsminde pigalugulu ingerlatarigaluaraa tassuma nunap immikkoortuani Sjællandimiikkaluartoq tamanna akiliisussaavoq.
Tamanna Naammagittaalliuteqartarfiup 2019-imi aalajangiinermi aalajangersumik oqaatigaa.
Malittarisassat allanngortikkusukkai
Aalajangiinerli Danmarkimi ileqqumut nalinginnaasumut akerliuvoq.
Danmarkimimi kommuni angerlarsimaffik innuttaasup pinerluuteqarsimasup inissinneqarsimaneranut akiliisussaavoq – tassanilu innuttaasup ineriartornikkut kigaaquteqarnera apeqqutaanani.
Taamaammat Lollandip borgmesteriata akiligassat Danmarkip Kalaallit Nunaatalu akornanni avinneqartikkusuppai.
- Innuttaasunut pinerluuteqarsimasunut kommuni inissiisarfeqartoq (parnaarussivik imaluunniit inissiisarfik aaqq.) akiliissussaanngilaq. Kisiannili taamaattoqarataarsinnaavoq, Holger Schou Rasmussen oqarpoq.
AAMMA ATUARUK Tusagassiuutit: Sermersuup danskit kommunii aningaasartuutit pillugit eqqartuussivilersuukkai
Pinerluuteqarsimasunulli, ineriartornermikkullu kinguarsimasunut Kalaallit Nunaanni innuttaassuseqartunut pillaassuteqarnermut aningaasartuutit naalagaaffimmiit Namminersorlutik Oqartussaaniillu akilerneqartariaqartoq, taanna isumaqarpoq.
- Soorunami naalagaaffeqatigiiffiup iluani taama ittunik ikiorsiisarfeqartoqartussaassaaq. Taamaakkaluartorli ataatsimoorluta aningaasartuuteqarfigissavagut, taanna oqarpoq.
Eqqartuussinermi Kommuneqarfik Sermersuumut ajugaasinnaanertik qanoq ilimanaateqartiginersoq Holger Schou Rasmussen eqqoriaruminaatsippaa. Lollandilli Kommunia ajorsassagaluaruni inatsinik allanngortitsinissamik ilungersuuteqarnissamut borgmesteriusoq piareersimavoq.
- Inatsisinik allanngortitassaqassappat taakku malersorneqartariaqarput, eqqartuusiviup aalajangernera apeqqutaatinnagu. Tunngavissaqarluarsoraara taamaatumillu ilungersuutigerusussinnaavara.