Naliliisartoq ukiortaamut oqalugiaatip kingorna: Namminiilivinnissamut innuttaasunut taasititsisoqarnissaanut sivisujunnaartoq

Eqqissisimaarnarnerusinnaanngingajappoq.

Aputip Nuuk qallersimagaa, tussiullu ”Qujavunga” tunuliaqutaani appisimaarneqartoq tusaaneqarsinnaavoq.

Naalakkersuisut siulittaasuata Hans Egedep Illuanit oqalugiarnera KNR-ip ileqqoq malillugu januaarip aallaqqaataani aallakaatippaa.

Múte B. Egede juullip ulloriaanit sungaartumik aappaluartumik qaamaneqartumik tunuliaqutaqarluni nunatsinni tamanut ukiortaami pilluaqqusillunilu nunatta siunissaanut neriuuteqalersitsisumik minutsini 25-ni oqalugiarpoq.

Siunissaq Múte B. Egedep nammineq oqarneratut nunatta ”nunasiaataasimanerup kalunnerinik taasinnaasatsinnit” avissaarnissaanut aamma ”nunarsuarmioqativut naligalugit suleqateqarnissamut” aporfitsinnik qaangiiffigisassaa.

- Oqaluttuarisaanerup takutippaa aamma ulloq manna tikillugu takusinnaavarput Kunngeqarfik Danmarkimik suleqateqarnerput aaqqissuussaaneq taamak isikkoqartillugu, tamakkiisumik naligiinnermik pilersitsisimanngitsoq (...) Nunattalu alloriarnermut tullermut ikaarsaarnissaa piffissanngorpoq, Múte B. Egede ukiortaamut oqalugiaammini oqarpoq.

Naalakkersuisut pingaartumik Nuummi mittarfittaap ammarnera Ilulissanilu mittarfissaq nunatta – Danmark akunnermiliuttorinagu nunarsuup sinneranut matunik ammaaneranut takussutissaalluartutut isigaat.

Naliliisartoq: Avissaarnissamut innuttaasunut kiisami taasititsisoqangajalersinnaavoq

Múte B. Egedep nunatta namminiilivinnissaanut suliaqarnerup aallartittareernera eqqaasitsissutigaa.

Tunngaviusumik inatsisissatut missingiut Tunngaviusumik Inatsisissaq pillugu Isumalioqatigiissitamit ukiut marluk matuma siorna tunniunneqarnera alloriarnerit annertuut ilagaat.

Tamatuma saniatigut naalakkersuisut paragraf 21-isumalioqatigiissitamik taaneqartoq namminiilivinnissamut aamma naalagaaffinngornissamut aqqummik ersarissaasussamut aningaasanik immikkoortitsipput.

- Qinigaaffillu nutaaq aggersoq tassaasariaqarpoq innuttaasut peqatigalugit alloriaqqiffiusariaqartut qanoq ilusilernissaannut aamma siunissami aaqqissuussaanerup qanoq ittup siunnerfiginissaanut tunngaviliiffissaq. Nunattami ineriartornera nutaaq aallartikkaluttuarpoq, Múte B. Egede oqarpoq.

KNR-ip politikkikkut naliliisartuata, Ineqi Kielsenip oqarnera naapertorlugu naalakkersuisut siulittaasuata apriilip arfernat nallertinnagu qineqqusaartoqarnissaanut namminiilivinnissap qitiunissaa maanna inissippaa.

Ineqi Kielsenillu Múte B. Egede qinigaaqqissaguni namminiilivinnissamut innuttaasunut taasititsinissamut piareertoq ilimagaa.

- Qinigaaffimmi tullermi ukioq manna aallartittussami tamanna pinissaa ilimagaara, taanna DR-imut oqarpoq.

Ineqi Kielsenip qineqqusaartoqarnissaa namminiilivinnissamut oqalliffiussasoq ilimagaa. Taassuma ukiortaamut oqalugiaammi sammisat IA-p nalinginnaasumik pingaartitai sammineqanngitsut ilanngullugu oqaatigaa. Assi © : Johansinnguaq Olsen/ KNR

Trump aamma aaqqiagiinnginnerit Danmarkimut ajornakusoortitsisut

Akuersissuteqarani naartunaveersaasiinerit aamma kalaallit meerartaannik Danmarkimi arsaarinninnerit pillugit suliat Danmarkip nunattalu akornanni ataqatigiinnermut pingaarnertut ajornerulersitsillutillu namminiilivinnissamut apeqqummik oqaluuserinnitsitsilerput.

Aamma Donald Trumpip USA-p Kalaallit Nunaannik ”piginnittuunissaa nakkutiginninnissaalu” pingaaruteqarluinnartoq oqarnera oqaluuserinnissutissaqalersitsivoq.

Oqaaseqarneq tamanna Múte B. Egedep erseqqissumik itigartitsissutigaa.

- Kalaallit Nunaat inuiaat Kalaallit pigaat. Tuniniagaanngilagut aamma tuniniagaalernavianngilagut.

Ministeriunerup, Mette Frederiksenip (S) oqallinneq tamarmi ungasinneruaa.

Taassuma ukiortaamut oqalugiaammini nunarput naatsuinnarmik eqqaavaa.

- Savalimmiut, Kalaallit Nunaata Danmarkillu akornanni Nunani Avannarlerni ukiuni kingullerni suleqatigiinnitsinnik pitsaanerulersitsinerput nuannaarutigaara.