Tusagassiuutit: Sermersuup danskit kommunii aningaasartuutit pillugit eqqartuussivilersuukkai

Nunatta innuttaasut eqqarsartaatsimikkut kinguarsimasut pinerluuteqarsimasullu Danmarkimi immikkut ittumik inissiisarfimmiittussangortittarpai.

Taakkuli Danmarkimi immikkut ittumik inissiisarfimmi najugaqarnerminni – imaluunniit inissisimaffimmit anisinnaatitaanermi nalaani nutaamik pinerluuteqaqqikkunik inissiisarfimmiittussanngortinneqaqqinnerat danskit kommuniata inissiisarfiup sumiiffigisaata tamanna akilertussaavaa.

Tamannali kukkunerusoq, danskit kommunii, Kommuneqarfik Sermersuup eqqartuussivimmut suliassanngortitai isumaqarput. Danmarkimi Lolland Falster Tidende aamma Radio4 taama allaaserisaqarput.

Tamannami Danmarkimi kommuninut kalaallinik eqqarsartaatsimikkut kinguarsimasunik pinerluuteqarsimasunik tigusisartunut aningaasartuuteqartitsinerujussuusoq, Lollandip Kommuniani isumaginninnermut suliffeqarnermullu susassaqarfimmi pisortaq, Jesper Daugaard isumaqarpoq.

Tamannali aningaasanut kisimi tunngannginnerarpaa.

- Kisianni aningaasanut kisimi tunngassuteqanngilaq. Innuttaasut uku inatsisitigut isumannaatsuunissaannut aamma ajorpoq. Kalaallit Nunaata taakku Danmarkimut nassiunneqaraangata iperavittarpaat. Tamanna aamma alianarpoq.

Naammagittaalliuteqartarfiup nunarput tapersernikuugaa

Danmarkimili Naammagittaalliuteqartarfiup kalaallit eqqarsartaatsimikkut kinguarsimasut danskit inissiisarfiiniinneranni nutaamik pinerluuteqaqqinneranni nunatta akiligassanut pisussaatinneqannginnissaa 2019-imi aalajangernikuuaa.

Tamanna pisumi ataatsimi kalaallisut innuttaassusillip Lollandip Kommuniani illoqaffimmi Rødbyhavnimi Kofoedsmindemiinnermini nutaamik pinerluuteqaqqinnera kommunimut 8 millionit koruuninik akiligassaqarfiulerpoq.

AAMMA ATUARUK 23-nik ukiulik ineriartornermigut innarluutilik angajoqqaami sinittarfianni sinittartoq

Akiligassaq taanna aallaqqaammut Kommuneqarfik Sermersuumut nassiunneqarpoq. Naammagittaalliuteqartarfiullu aalajangiinerata kingunerisaanik taanna Lollandip Kommunianut nassiunneqaqqippoq, tamannali suli akilerneqanngilaq.

Taamaammat Kommuneqarfik Sermersuup suliap aalajangiiffigineqarnissaa pillugu Lollandip Randersillu kommunii eqqartuussivimmut maanna suliassanngortippai.

Lollandimili borgmesterip, Holger Schou Rasmussenip (S) danskit kommuniisa akiliinissaat itigartitsissutigaa. Taamaammat suliamik pisariaqarpat Eqqartuussiviit qullersaannut ingerlatitseqqinnissamut piareersimavoq.

- Uani suliaq pineqartoq tunngaviusumik aalajangiineruvoq taamaattumik eqqartuussiviit qullersaannut ingerlateqqinnialersaarparput. Kalaallit Nunaannit innuttaasut Lollandimi inissiisarfimmiitsinneqarnerat pissutigalugu akisussaaffimmik aningaasartuutinillu tigusinissarput eqqortuusinnaanngilaq.

Qeqqata Kommunia Slagelsillu Kommunia suliamut tassunga assingusumik akiligassanut maanna aamma aaqqiagiinngissuteqatut, Sermitsiaq.AG allappoq.