23-nik ukiulik ineriartornermigut innarluutilik angajoqqaami sinittarfianni sinittartoq

Ineriartornermigut innarluutilik, Qaaqqutsiannguaq Nielsen angajoqqaami illuanni 64 kvadratmeterisut angitigisumi, marlunnik sinittarfilimmi najugaqarpoq. Angerlarsimaffimmi tassani ilaquttani allat sisamat najugaqatigai. Taamaammat 23-nik ukiulik, Qaaqqutsiannguaq Nielsen angajoqqaami sinittarfianni siniffeqarpoq.

Qaanaami innarluutillit ornittagaannik peqannginnera pissutigalugu anaanami ullaakkut suliartornerani illoqarfiup aqquserngani ingerlaarujoortarpoq - taassumalu ulluinnai taama ingerlasarput.

- Nammineersinniarsarisalernikuuarput massakkut soorlu errorsinernut erruinernut, tassami oqarsinnaanngilanga inuunerput naallugu najortussaallugu, utoqqaliartortussaagatta soorunami aamma inuuneq nalunaqimmat. Nammineersinnaasusaa uanga annermik angurusuppara, Qaaqqutsiannguaq Nielsenip arnaa, Korna Isaksen Nielsen KNR-imut oqarpoq.

Innarluutillit illersuisuata isornartorsiuinera - pisinnaatitaaffiit malinneqanngillat

Tilioq Qaanaamut ukioq manna maajip qaammataani angalavoq, tassangalu nalunaarusiortoqarluni. Nalunaarusiami tassani Naalagaaffiit Peqatigiit innarluutillit pisinnaatitaaffii pillugit isumaqatigiissutaat Qaanaami malinneqanngitsoq ilaatigut allassimavoq. Tamanna innarluutillit illersuisuata, Christina Johnsenip inerniliissutigaa.

Tiliup tikeraarneranit qaammat ataaseq qaangiuttoq ornittakkamik ammaasoqarpoq, taannali festsalitut nassuiaatigineqarpoq. Ornittagaq aamma ullormi ataasiinnarmi atorneqarpoq, sulisummi sumiiffimmi nutaami pissutsit pillugit akerliullutik soraarput. Illu inunnut innarluutilinnut naleqqutinngilaq. Inissiami imeq, perusuersartarfiit amigaataapput, ilagaallu aserornikuullutik.

Borgmesterip ornittagaqalernissaa neriorsuutigaa

Avannaata Kommuniani borgmesterip, Palle Jeremiassenip Siumumeersup Qaanaami inunnut innarluutilinnut ornittagaqalernissaa ippassaq Qanoruumi apersorneqarnermini neriorsuutigaa. Borgmesterip oqarnera naapertorlugu illu imeqanngitsoq maanna atorneqarsinnaatinneqalerpoq, innarluutilinnut naleqqussarneqarluni erngertumik atorneqarsinnaalissaaq.

Qaanaami inunnut innarluutilinnut pissutsit naammanngitsut borgmesterip Qanoruukkut nassuerutigaa, kisimiillunili suliassamik kivitsisinnaanani aamma oqaatigalugu.

- Inatsisartut naalakkersuisullu uani ilaasariaqarput pissutsit suli pitsaanerulissappata, taammaattumik pisortaqatigiit uatsinnut suleqatigiittariaqarpugut suliassat pitsanngorsarnissaat anguniarlugu, Palle Jeremiassen KNR-imut oqarpoq.

Avannaata Kommuniata inunnut innarluutilinnut suliat igalaakkut isumagineqartarunnaarsimasut, Palle Jeremiassenip ilanngullugu paasissutissiissutigaa.

Innarluutillit kommunip Qaanaami immikkoortortaqarfianut isersinnaannginnerat pissutigalugu siornatigut taamaattoqartarsimavoq. 

Suliamik isumaginnittut maanna inunnut innarluutilinnut kommunimit ikiorneqarnissaminnik pisariaqartitsisunut angerlarsimaffinnut ullumikkut orniguttoqartarpoq.

Borgmesterip kommunip allaffianut kaasuartakkanut majuartarfinnik ukioq manna pilersitsisoqarnissaa piumasarisimavaa.

Qaaqqutsiannguaq Nielsen tallimanngormat perorsaasumik tapersersorteqalersimavoq.

- Toqqissiallannaqaaq, taavalu imannak misissuerujussuarunnaarlunga soorlu suliffimma avataatigut alapernaanniarneq taanna atoraluarpara ernera ernumagalugu, Korna Isaksen Nielsen oqarpoq.