Franskit eqqumiitsuliortut Akunnaami takutitsisut
Franskit eqqumiitsuliortut tallimat Akunnaamut decembarip aallartilaarnerani tikittut suliarisimasaminnik decembarip 28-ani arfininngornermi saqqummersitsipput.
- Tikilluaritsi Akunnaarmiut. Nuannaarpunga Akunnaaq Kultur Illumi tikilluaqqusinnaagassi.
Eqqumiitsuliortut ilaat - Schweisermiu, Ludmilla Mercier - alakkaasunut kalaallisut taama tikilluaqqusivoq.
Naallu saqqummersitsinermut alakkaasorpassuaqaraluartoq eqqumiitsuliortut nunaqarfimmiinnerat nipaassimaqaaq.
Nunaqarfimmilu nipaatsumiinneq eqqumiitsuliortunut iluaqutaasimaqaaq, tamaanimi nipiliortunik akornusersorneqaratik suliaqarsinnaanertik iluarisimaarpaat.
Julien Lachal nipinik immiussaminik videonillu seqersitsilluni ineeqqap iluani inuunerup ingerlarnga takusassiaraa.
- Maaniinninni inuit naapinneri, inooriaasaat, qanoq inneri qanorlu allaanerutiginera misigisanni annerpaapput. Kisianni ilimagisanniit allaanerunngilluinnarpoq, aammami avannaaniippoq nillernissaalu ilimagereernikuuara.
Taanna illoqarfimmi innuttaasunit isumassarsitinneqarsimavoq, eqqumiitsuliaatalu ingerlanneranut tamanna aqqutissiuisimavoq:
- Maanimi inuit pitsaalluinnarput, soqutiginaateqarput, oqaluttuassaqarlutillu asannipput taamatullu atassuteqarneq nuannaraara.
Aput perserneralu
Sinerissatsinni decembari silagippallaanngikkaluartoq, Ludmilla Mercierimut taalliorlunilu erinniortartumut persernera atorluarneqarpoq.
- Akunnerpaalunni anori tusaasinnaallugulu sarsuarujoortullu igalaaniit isigalugit assiliartalersuutigalugit isiginnaarsinnaanera, assorsuaq uannut soqutiginarpoq, taanna oqarpoq.
Julien Lachalip Akunnaamiinnermini nipit assigiinngitsorpassuit soorlu sermip nipaa, anori, inuit oqaluasaarneri ilaatigut immiuppai.
- Ilimagaara ima ittumik saqqummersitseqqissallunga, immiussamali pitsaassusai apeqqutaassapput, niperpassuarnimmi immiussaateqarpunga, taanna oqarpoq.
Franskit eqqumiitsuliortut Akunnaamut suliaqariartorlutik 2019-imiilli ukiuunerani siullermeerlutik tikipput.
