Sisimiuni tunillatsissimasut arfinillit paasineqartut: Kommuni killerlersuinernik atuutilersitsisoq

Massakkuugallartumik Sisimiuni tunillatsissimasut arfiniliupput.

Sisimiuni amerlanerusut tunillatseqqunagit Qeqqata Kommuniani ornigulluni saaffiginnittarnerit ullumikkut marlunngornermi matuneqarput.

Kommuni tusagassiuutinut taama allappoq.

Sisimiuni najugaqaraanni taamaallaat sianerluni kommunimut saaffiginnittoqarsinnaavoq.

Kommuni aamma paaqqinnittarfinnut, bussinut utoqqaallu angerlarsimaffianut Qupanumut immikkut ittumik malittarisassaliorpoq.

AAMMA ATUARUK Nalunaaqutaq sisamaniit killilersuisoqaqqilissaaq: Qanermut assiaqutit isersimasinnaatitaasullu 20-t

Paaqqinnittarfinni angajoqqaat kisimik qitornanik aallertuullutillu apuussisinnaapput. Tassa ilaqutaasut ikinngutaasulluuniit allat qitornaanik aallerlutillu apuusisinnaanngillat.

Sisimiuni busserniaraanni ilaasussat qanermut assiaquteqaqqaasapput. Bussini issiavissaqaraanni aatsaat ilaasoqarsinnaavoq. Issiavissaqanngikkaani ilaasoqarsinnaanngilaq. 

Utoqqaat angerlarsimaffianni Qupanumi pulaartoqaqqusaanngilaq.

- Nakorsaaneqarfimmiit paasissutissanik nutaanik pisoq pillugu nalilersuisoqaqqippat allanilluunniit malittarisassaqalissappat, ornigulluniluunniit saaffiginnittarfik ammaqqinneqassappat paasissutissiiumaarpugut, tusagassiuutinut kommuni allappoq.

Nuna tamakkerlugu killilersuinerit

Nuna tamakkerlugu coronavirusertut katillugit 13-t siumorneqarsimasut Nakorsaaneqarfimmeersoq nakorsaq, Paneeraq Noahsen, tusagassiuutinut katersortitsinermi nassuiaavoq.

Ilulissani ataaseq, Sisimiuni arfinillit, Nuummi ataaseq, Qaqortumi pingasut, Narsami ataaseq Narsarsuarmilu ataaseq.

Taamaattumillu marlunngornermiit nalunaaqutaq sisamaniit tallimanngorpat juulip 16-iata tungaanut atuutussamik Naalakkersuisut killilersuipput.  

Ullumi marlunngornermi nalunaaqutaq sisamanut aallarnerfigalugu pisiniarfinni qanermut assiaquteqaqqusaaneq aallartippoq. Bussini taxanilu qanermut assiaquteqarnissaq piumasaqaataavoq.

Bussinilu issiavinni inissallit kisimik ikisinnaatitaapput.

Timmisartuni, umarsuarni sumiiffinnilu tamanut ammasuni aamma qanermut assiaquteqarnissaq piumasaqaataavoq. 

Ilaatigut neriniartarfinni imerniartarfinnilu qanermut assiaquteqarnissaq piumasaqaataavoq.

Aamma sumiiffinni qatsersisartut inimut isersinnaasut akuerisaasa affaannaannik isertitseqqusaanerat atuutilerpoq.

Tassani niuertarfinni isersimaqqusaasut affaanai iseqqusaapput. 

Tamanut iserfigineqartartunut soorlu neriniartarfinni inuit isertut amerlanerpaamik 20-iusinnaapput. Eqqaanilu silami 20-nik issiaarfissaqarpat amerlanerpaamik inuit issiaarsinnaasut 20-iusinnaapput. Nuna tamakkerlugu oqaluffinni killilersuineq aamma atuuppoq.