Nalunaaqutaq sisamaniit killilersuisoqaqqilissaaq: Qanermut assiaqutit isersimasinnaatitaasullu 20-t

Nunatsinni arlallit tunillanneqareersullu katerissinnaanermut killilersuisoqaqqilerpoq. Naalakkersuisut siulittaasuat marlunngornermi nalunaarpoq.
Assi © : KNR / Mathies Hvid Toft
Allattoq Malik Brøns
juulip 13-at 2021 13:50
Nutserisoq Naja-Vivi Mikaelsen

Arfininngormalli nunatsinni coronavirusertut qulingiluat siumorneqarput.

Tusagassiortunik katersortitsinermi nunatsinni coronavirusimik tunillanneqarsimasut inuit 13-iisut, Nunatta nakorsaaneqarfiata nakorsaata, Paneeraq Noahsenip, oqaatigaa.

- Piffissap ingerlanerani amerlanerusut tunillatsissimasinnaanerat ilimagissavarput, taanna oqarpoq.

Killiffik massakkumut imaappoq: Ilulissani ataaseq, Sisimiuni arfinillit, Nuummi ataaseq, Qaqortumi pingasut, Narsami ataaseq Narsarsuarmilu ataaseq.

Taamaattumik Naalakkersuisut nuna tamakkerlugu killilersuipput.

Ullumi marlunngornermi nalunaaqutaq sisamat aallarnerfigalugu pisiniarfinni qanermut assiaquteqaqqusaaneq aallartippoq. Bussini, taxani, timmisartuni, umarsuarni sumiiffinnilu tamanut ammasuni aamma qanermut assiaquteqarnissaq piumasaqaataavoq.

Assersuutigalugu neriniartarfinni imerniartarfinnilu qanermut assiaquteqarnissaq piumasaqaataavoq.

Bussinilu issiavinni inissallit kisimik ikisinnaatitaapput.

Aamma sumiiffinni qatsersisartut inimut isersinnaasutut akuerisaasa affaannaannik isertitseqqusaanerat atuutilerpoq.

Tamanut iserfigineqartartunut soorlu neriniartarfinni inuit isertut amerlanerpaamik 20-iusinnaapput. Eqqaanilu silami 20-nik issiaarfissaqarpat amerlanerpaamik inuit issiaarsinnaasut 20-iusinnaapput.

Killilersuinerit ullumi marlunngorneq nalunaaqutaq sisamaniit tallimanngorpat tungaanut atuutilissapput.

- Killilersuinerit sivitsorneqarsinnaaneri naatsorsuutigineqarsinnaasoq, Naalakkersuisut siulittaasuata Múte B. Egede oqaatigaa.

Nunatsinnut angalasut tamarmik coronamik tunillatsissimannginnermut uppernarsaammik tunniussisarnissaat ukioq ataaseq missaa piumasaqaataavoq.

Misissortinneq annerpaamik ullunik pingasunik (akunnernik 72-nik) pisoqaassuseqarnissaa piumasaqaataavoq.

Aamma aallalernermi immersugassamik Siumumik tunniussisoqartarnissaa piumasaqaataavoq.

Peqqinnissamulli tunngatillugu innersuussutit tamarmik suli malinneqassapput: 

  • Akulikitsumik errortortarneq imaluunniit assanut spritimik atuineq.
  • Qanit talinnik asserlugu quersortarit tangajortarlutillu.
  • Qitserarnaveersaarit. Allanut tunillaassuutaasinnaammat. 
  • Inummiit inummut attaveqarnaveersaarneq, eqqiaaneq silaannarissarnerlu eqqumaffigikkit
  • Allanut qanillinaveersaarneq 2 meterimillu ungasitsigineq. 

Nutartissaaq...

Aamma atuaruk