Saviminilerinermut tunngasuni ilinniartunut allagartartaartitsisarneq qulakkeerneqartoq

Ataasinngorneq aggustip 25-anni ulloq pingaaruteqartoq malunnartinniarneqarpoq, ilinniartut ilinniakkaminnik naammassinnillutik allagartartaartinneqarnerat Hans Egedep illuani nalliuttorsiutigineqarmat. Ilinniartut pineqartut datateknikeritut, flymekanikeritut entreprenørmaskinmekanikeritullu inuussutissarsiornermi ilinniagalittut naammassipput.

Ilinniakkat pineqartut aaqqissuussaanerat naapertorlugu, Danmarkimi inuussutissarsiornermut ilinniarfinni atuagarsoriarnermik Kalaallit Nunaannilu suliffimmik misiliinertalimmik imaqarput. Taamatut ilinniartitseriaatsit qanoq akuerineqarnissai pillugit maannamut erseqqissumik periuseqartoqarsimanngilaq tamannalu allagartartaartitsiniarnermut kinguarsaataasarsimavoq.

Kalaallit ilinniartut ilinniagarisaminni ingerlatassat ilaannik naammassinnikkaangata allatulli allagartartaarsinnaanissaat qulakkeerniarlugu maanna aaqqiissutissarsisoqarpoq.

- Kalaallit ilinniartut nersornaammik piumasaqarsinnaatitaapput aamma nersornaasigaanissaata qulakkeerneqarnissaa uagutsinnit pingaartinneqarsimavoq. Allagartaat ilinniakkaminnillu paasisimasaqalersimanerat pisariaqanngitsumik utaqqisitsinani soorunalimi tunniunneqassaaq, Peter Faber, Dansk Metal-imi kattuffiup allattaa, oqarpoq.

Aaqqiissut tamanna saffiugassalerinermik ilinniarnermik ingerlatsineq pillugu ataatsimiititaliap, Ilinniartitaanermut Naalakkersuisoqarfiup aamma Danmarkimi Meeqqanut Ilinniartitaanermullu Ministereqarfiup suleqatigiinnerisigut piviusunngorpoq.

Dansk Industrimi pisortap tulliata Signe Tychsen Philipip tamanna erseqqissaatitut pingaaruteqartutut oqaatigaa:

– Tamanna suleqatigiinnermik nukittorsaataallunilu inuussutissarsiornermut tunngasutigut ilinniagaqarnermut tunngatillugu Kalaallit Nunaanni inuusuttut allatulli periarfissaqartinneqartarnissaata qulakkeernissaanut ajornannginnerulersitsivoq.

Trine Egedettaaq, Ilinniartitaanermut Naalakkersuisoqarfimmi pisortap, inuusuttut pisortatigoortumik allagartartaartinneqarnerat nuannaarutigaa:

– Kalaallit Nunaanni inuusuttut ilinniakkaminnik naammassinnikkaangata tamanna inuttut ataasiakkaatut ilaqutariittullu angusatut isigineqartarpoq. Taamaattumik maanna allagartat tunniunneqarnerat immikkoortullu pingaarutillip naggaserneqarneranut nalunaaqutaanera pingaaruteqarluinnarpoq, taanna oqarpoq.