Savalimmiut Nunanut Allanut Ataatsimiititaliami aalajangersimasumik ilaasortanngorput – Kalaallit Nunaat suli paasinarsinngilaq
Venstre Folketingimut novembarip aallaqqaataani qinersinermi qinersisartunit pillarneqarpoq Folketingimilu Nunanut Allanut Ataatsimiititaliami inissat pingasuinnaat pissarsiaralugit.
Taamaakkaluartoq inissaq ataaseq Anna Falkenbergimut Venstrep Savalimmiuni politikkikkut peqatigisaanut Sambandspartiet-mut tunniunneqassasoq partiimit aalajangerneqarpoq.
- Nunanut Allanut Ataatsimiititaliami suliarineqartorpassuit atlantikup avannaani qinigaasunut aamma pingaaruteqartorujussuupput, Venstrep Folketingimi gruppiata siulittaasua Thomas Danielsen oqarpoq.
Folketingimi Nunanut Allanut Ataatsimiititaliaq
Folketingimi Nunanut Allanut Ataatsimiititaliaq kunngeqarfimmi tamarmi naalakkersuisut nunanut allanut politikkiannik aalajangiisooqataavoq. Tamanna tunngaviusumik inatsimmi allassimavoq.
Nunanut Allanut Ataatsimiititaliaq ulluinnarni taaneqartarpoq Nævnet imaluunniit UPN (Udenrigspolitisk Nævn).
Tassani kunngeqarfimmi isumannaallisaaneq nunanullu allanut politikki pillugu paasissutissat pingaarnerpaat isertugaanerpaallu tunniunneqartarput.
Inissat Folketingimi partiit annertussusaat aallaavigalugit agguaanneqartarput inissallu partiinit partiiniillu suleqataannit agguaanneqartarlutik.
Nunanut Allanut Ataatsimiititaliami inissat 17-iupput.
Ataatsimiinnerni paasissutissat oqaaseqaatillu tunniunneqartut pillugit ilaasortat nipangiussisussaatitaapput.
Ataatsimiititaliani ilaasortaatitaminnik partiit kissaatitik naapertorlugit taarsiisinnaapput.
Nunanut Allanut Ataatsimiititaliami ilaasortat allattorsimaffiat takusinnaavat.
Anna Falkenbergillu ataatsimiititaliami pissaaneqaqisumi aalajangersimasumik inissaqartinneqarnini soorunami nuannaarutigaa.
- Aalajangiinerni Savalimmiunit isummat oqariartuutigisassavakka ilisimatitsinerillu apeqquteqarfigisarlugit, taamaaliornikkut naalakkersuisunut eqqaasitsissutigiuaannarsinnaassallugu naalagaaffik pingasunik agguarneqarsimammat nunanut allanut isumannaallisaanermullu politikkiannik aqutsiffigisaaminnut, KNR-imut oqarpoq.
Kalaallit Nunaat taartissat inaanni
Socialdemokratiet-niilli qinersinermi partiini anginerpaanngortumit maannalu naalakkersuisunngortitsiniarluni isumaqatiginninniartumit Siumumut, Inuit Ataqatigiinnut Savalimmiunilu politikkikkut peqatigisamut Javnaðarflokkurin-imut Nunanut Allanut Ataatsimiititaliami aalajangersimasumik inissaqartitsisoqanngilaq.
Aamma qinigaasut taakku Mette Frederiksenip partiit aappaluttut peqatigalugit amerlanerussuteqarneranut aalajangiisuugaluartut.
Taarsiullugu Ataatsimiititaliami inissat agguataarneqarnissaasa oqaluuserineqarnissaannut naalakkersuisunngortitsinissaq utaqqineqarpoq.
Maannamut Aki-Matilda Høegh-Dam Siumumeersoq, Aaja Chemnitz IA-meersoq aamma Sjurður Skaale Javnaðarflokkurin-imeersoq sinniisaaginnarput – soorlu aamma ukiuni kingullerni pingasuni taamaassimasut.
AAMMA ATUARUK Siumup IA-llu Mette Frederiksen ataatsimeeqatigereerlugu partiinik allanik oqaloqateqartut
Aaja Chemnitzip Venstre nersualaarpaa inissaatimik ilaannik ataatsimik atlantikup avannaani suleqatiminnut tunniussisimammat. Oqaatigerusunngilaali Folketingimi partiit aappaluttut akornanni assinganik pisoqarnissaanik naatsorsuutigisaqarnerluni.
- Partiit aappaluttut suleqatigiinneranni aamma taamaaliortoqartariaqartoq soorunami isumaqarpunga, kisianni isumaqatiginninniarnerit ingerlanneqarput taamaammallu sioqqullugu tamanna pillugu oqaaseqarsinnaananga, oqarpoq.
Qinersisoqarmalli Aaja Chemnitz Folketingimi partiinit tusagassiorfinnilllu piumaneqartorujussuusimavoq, takuneqarsinnaasimammat statsministeriugallartoq Mette Frederiksen (S) Danmarkimilu partiit aappaluttut taamaallaat amerlanerussuteqarsinnaasut IA-mit tapersersorneqarpata.
Issittoq nunanut allanut politikkimi inituvoq
Qinersivimmi kingullermi Siumut IA-lu Nunanut Allanut Ataatsimiititaliami sinniisaasimapput.
Taamaattorli ataatsimiinnerni arlaqartuni peqataasarsimapput, ataatsimiinnerni partiini aappaluttuni qinikkat inissatik Aki-Matilda Høegh-Damimut Aaja Chemnitzimullu tunniuttarsimammatigit.
- Nunanut Allanut Ataatsimiititaliami sinniisuuninni ataatsimiinnerit 80 procentiinut taartaatinneqartarpunga. Taartissatullu isertinneqarnissamik kissaateqaraangama ajornartorsiutaaneq ajorpoq, Aaja Chemnitz oqarpoq.
AAMMA ATUARUK Aaja aamma Aki-Matilda ministeriuneq isumaqatigiinniarfigissagaat: Allannguisoqarnissaa piumasaraat
Ukrainemi qaartartup nakkarnera pillugu Nunanut Allanut Ataatsimiititaliami ataatsimiinnermi kingullermik pingasunngormat peqataavoq.
Taamaattorli Aaja Chemnitz ataatsimiinnernut peqataasinnaanerluni apereqqaartariaqarusunngikkaluarpoq.
- Kalaallit Nunaat aalajangersimasumik inissaqassasoq isumaqarpunga. Suliammi amerlasuut Kalaallit Nunaannut tunngassuteqarput. Suliaq Kalaallit Nunaannut tunnganersoq tunngannginnersorluunniit sioqqullugu takuneqarsinnaajuaannarneq ajorpoq. Issittumut Kalaallit Nunaannullu tunngatillugit nunanut allanut politikki initunerujartuinnarportaaq.
Danmarkimi nutaanik naalakkersuisunngortitsiniarluni isumaqatiginninniarnerit suli ingerlapput, maannamut sapaatip akunnerisa pingajuat aallartissimalluni.
Suliaq pillugu Socialdemokratiet maannamut oqaaseqartissinnaasimanngilarput.
Aki-Matilda Høegh-Dam (S) suliaq pillugu KNR-imit apersorneqarnissamut aamma periarfissaqarsimanngilaq.
Leif Lahn Jensen, Socialdemokratit Folketingimut ilaasortaatitaasa siulittaasorigallagaat allagaqarluni ima akissuteqarpoq:
- Siumut IA-lu isumaqatigiissusiorfigeriarlugit Siumut IA-lu nunat allat pillugit ataatsimiititaliami Folketingimut qinersisoqannginnerani issiavitik tigummiinnassavaat, taanna oqarpoq.
