Siumup IA-llu Mette Frederiksen ataatsimeeqatigereerlugu partiinik allanik oqaloqateqartut

Folketingimut qinigaaqqammertortavut marluusut naalakkersuisunngortitsinissamik ministeriunerup atorfilittut Københavnip avannaani najugarisaani, Marienborgimi, isumaqatigiinnialeruttornerni ippassaq ataasinngornermi peqataapput.

Taakku immikkut peqataapput.

Siumumeersoq Aki-Matilda Høegh-Dam partiimik Danmarkimi naalakkersuisunngortitsiniarnermi kissaataanik saqqummiivoq.

Siumup kissaatai, partiip taassuma siulersuisuuneranit akuerisaasut, ilaatigut naalagaaffiup nunatsinni Danmarkimilu tjenestemandit, ingammik politiit pineqaatissinneqarsimasunullu inissiisarfinni nakkutilliisut, assigiimmik akissarsiaqalertariaqarnerannut Danmarkillu nunatsinni suliassaqarfimminik, ingammik eqqartuussiveqarnermi suliassaqarfimminik, pitsanngorsaasariaqarneranut tunngapput. 

Naalakkersuisuujunnaaqqammertut atuunneranni suliarilereersimasatik naammassineqarnissaat aamma pingaartikkitsik, Aki-Matilda Høegh-Dam oqarpoq:

AAMMA ATUARUK Aaja aamma Aki-Matilda ministeriuneq isumaqatigiinniarfigissagaat: Allannguisoqarnissaa piumasaraat

- Suliarileriikkavut naammassitikkusukkatsigit – taamaammammi aamma sassaqqippugut, suliarileriikkavut  sapinngisamik naammassinissaat sulissutigerusullutigu.

Kisianni Mette Frederiksenilu Socialdemokratillu sorpiaat siullermik isumaqatigiinniaqatigisimaneritik, taassuma oqaatigiumanngilaa.

- Suut qanorlu oqaluuserinerivut itinerusumik pulaffiginaveersaarpakka, una(unaluunniit aaqq.) ilumut qanoq piviusunngorsinnaanersoq eqqartussallugu periarfissaqaraangama, taava isumaqatigiinniarnerit aallartittaramik, Aki-Matilda Høegh-Dam oqarpoq.

Inuit Ataqatigiinneersoq Aaja Chemnitz partiimik Danmarkimi naalakkersuisunngortitsiniarnermi kissaataanik quliusunik Marienborgimi ataatsimiinnermi aamma saqqummiivoq.

Taakku ilaatigut nakorsiat nunatsinneersut Danmarkimi katsorsagassatut innersuunneqarsinnaasariaqarnerannut, Københavnimi ilinnialeqqammersortatta kollegiamik inissarsissunneqarsinnaasariaqarnerannut naalagaaffiullu nunatsinni Danmarkimilu tjenestemandit assigiimmik akissarsiaqalertariaqarnerannut tunngapput. 

Nunatta aalajangiisooqataassinnaassuseqarnini ersersissavaa

Danmarkimi peqqinissaqarfimmik aaqqissuusseqqinnissaq, Mette Frederiksenip (S) danskillu partiivisa kisimiillutik isumaqatigiinniassasutigaat.

Folketingimulli qinigaaqqammertortavut partiinik allanik aamma ataatsimeeqateqarput.

Assersuutigalugu Aaja Chemnitzip Mette Frederiksen ataasinngormat ataatsimeeqatigeriiatsiarlugu, Moderatit siulittaasuat Lars Løkke Rasmussen aamma ataatsimeeqatigaa. Tamannalu uitsatigineqarpoq.

Tamannali mamiatsaatigineqartariaqanngitsoq eqqumiigisassanngitsorluunniit, Aaja Chemnitz erseqqissaavoq.

- Kikkunnimmi ataatsimeeqateqarsimanera allaninngarnit isertuaannerullunga unneqqarinnerullungalu oqaatigisarpara. Allammi uattulli aamma iliortarput; tassa partiinik allanik oqaloqateqartarput, aamma saamerliuniat talerperliuniallu akornanni aamma taamaaliortoqartarpoq.

AAMMA ATUARUK Aaja Chemnitzip Mette F tikkuarpaa - Løkkelu ualimut kingusinnerusukkut ataatsimeeqatigissallugu

Lars Løkke Rasmussenip ministeriuninngornissaanut talerperliuniallu naalakkersuisunngornissaannut tapersiiniarnani, taanna oqarpoq. Aammali Lars Løkke Rasmussenimik partiillu siuttuinik allanik oqaloqateqarluartuarnissi pingaartoq, taassuma aamma oqaatigaa. 

- IA saamerliuniat Folketingimi amerlanerussuteqarnerannut 90-issaraat, taamaakkaluartoq danskit partiivi ilaasortani Atlantikup avannaaneersunik qulaassiinnarsinnaasut takorlooruminarpoq. Nunatsinnut tunngasut sapinngisamik oqaluuserineqarnissaat qulakkeerniarlugu partiinik allanik suleqatigeriikkatsinnik siammasissumik suleqateqarnissaq pingaarpoq, taanna oqarpoq.

Aki-Matilda Høegh-Dam isumaqataavoq. Taassuma danskit partiivini allat oqaloqatigeriigai ukuupput: Enhedslisten, SF. Radikale Venstre aamma Alternativet.

Ilaat oqaloqatigerujuuginnarsimavai, ilaali nunatta qanoq pingaartigineranik eqqaasinniarlugit oqaloqatigisimavai.

- Marluulluta ataatsimoorluta isumaqatigiinniarnernut isissasugut taatsimeeqaaratta erseqqissumik siunnersuutigaarput,. Kisianni aamma partiip  aamma anguniakkani aallaavigalugit oqaaseqarusuppat, tamanna  allatuulli ataqqisariaqarparput, Aki-Matilda Høegh-Dam oqarpoq nangillunilu: 

- Oqaloqatiginninneruvoq. Soorlu imannak; qanoq ingerlavisi? Qinigaaqqinnissinni pilluaritsi. Kalaallit Nunaannut tunngatillugu massakkut qanoq isumaqarpisi?

Mette Frederiksenimi ataatsimeeqatiserineqaqqingajalernissartik marluullutik naatsorsuutigigitsik, Siumut IA-lu ilisimatitsipput.