Aaja Chemnitzip Mette F tikkuarpaa - Løkkelu ualimut kingusinnerusukkut ataatsimeeqatigissallugu

Aaja Chemnitzimik apersuinermeersunik ilallugu nutartigaq.

Inuit Ataqatigiinneersup Aaja Chemnitzip Mette Frederiksen (Socialdemokratiet) ministeriunissatut toqqarpaa. 

Tamanna Mette Frederiksenimik, Danmarkimi naalakkersuisunngortitsisinnaanerluni misissuileruttortumik. ullumi ataatsimeeqateqareerluni uteqqippaa.

-  Mette Frederiksen ministeriunissatut piukkussani periarfissagissaarnerpaavoq, Aaja Chemnitz oqarpoq.

Ingammik ataaseq aalajangiisuuvoq: Tassalu Mette Frederiksenip meeqqanut misilerataasimasunut utoqqatsernera. 

- Amerlanerussuteqartut Mette Frederiksen tikkuarpaat. Utoqqatsernissaminut pikkorissimasoq politikkikkullu sapiissusermik takutitsisoq isumaqarpunga.

- Kalaallit Nunaata Danmarkillu attaveqatigiinneranni pisimasup uuma kusanarpallaanngitsup isiginiarnissaaa uagutsinnut pingaartuuvoq, Aaja Chemnitz oqarpoq.

Løkke qinersinerup unnuaani allattoq

Taanna naalakkersuisunngorumaartussanut qulinik piumasaqaateqarpoq - aammali Moderatineersoq Lars Løkke Rasmussen ullumi kingusinnerusukkut ataatsimeeqatigissavaa.

Taanna allaanerusunik amerlanerussusiisinnaasussarsiorluni Aaja Chemnitsimut qinersinerup unnuaani allappoq.

Aaja Chemnitsilumi Lars Løkkep peqataaffigisaanik partiit amerlasuut naalakkersuisunngortitsissagaluarpata ajorinngilaa. Lars Løkke ministeriunerugami tusaaniartartoq, Aaja Chemnitz oqarpoq.

- Saamerliuniat amerlasujullutik naalakkersuisunngortitsinissaat kissaatigisaraara. Naalakkersuisunngortut taamaappaata nukissiuutit ataavartut, meeqqat, inuusuttut, peqqinneq atugarissaarnerlu pineqartillugit angusaqarfigiuminartinnerussavagut, Aaja Chemnitz KNR-imut oqarpoq

- Taamanna pinngippat naalakkersuisut qiterlerni tpeqataaffigineqartut – Taakkua Socialdemokratiullutillu Moderatiusinnaapput. Aamma Socialdemokratiullutik, Moderatiullutik aamma Venstresinnaapput. Taakkua tapersersorsinnaassavagut.

- Lars Løkke 2015-imi isumaqatigiinniaqartigisareernikuuara. Lars Løkke assersuutigalugu nunatsinni inuussutissarsiutit ineriaretortineri pillugit suleqatigisinnaanera periarfissaqartutut isigaara. Taava aamma Lars Løkke nunatsinnut tunngatillugu politikkikkut soqutigisaqartoq takusinnaavara, Kisianni naalakkersuisut kikkunnilluunniit peqataaffigineqaraluarpata, Naalakkersuisunut saamerliusunut siuttuusup Mette Frederikseniunissaa erseqqissassallugu uannut pongaarpoq, Aaja Chemnitz KNR-imut oqarpoq.

Aki-Matilda Høegh-Damip Aaja Chemnitzillu qinigaanerisigut folketingimi saamerliit marlunnik ilapput. Mette Frederiksenilu naalakkersuisunngortitsissaguni taakkua pisariasqarteqai:

AAMMA ATUARUK Mette F. siammasissumik naalakkersuisoqatigiiliortoqarsinnaa-nissaanut isumalluartoq

Danmarkimi qinersinerup inerneranut taanna innersuussivoq.

Saamerliimmi 87-inik tassani qinigaatitaqarput.

Talerperliit 73-inik qinigaatitaqarput.

Tassa imaappoq taakku arlaannaalluunniit 90-inik qinigaatitaqanngilaq – taamaalillutillu tamarmik amerlanerussuteqalersinnaanatik.

Tamatumalu Atlantikut avannaani qinersinernut soqutiginarluinnarsitsilersinnaapput.

Aki-Matilda Høegh-Dam nuannaartoq

Nunarpummi Folketingimut marlunnik qinigaqarpoq, ilimagineqartutullu tamanna inerneqassaguni Siumut Inuit Ataqatigiillu Folketingimiittuuteqaleqqissapput. 

Taakkulu tamarmik saamerlerneersumik ministeriunerulertussamik tapersiiniarput.
Savalimmiuni Javnaðarflokkurinimeersoq Sjúrður Skaale taakkununnga ilaassappat, saamerliunerusunit qinikkat 90-iussapput, taamaasillutillu ataatsimik amerlanerussuteqaqqatalaassallutik.

Mette Frederiksenili saamerlernik talerperlernillu peqataaffigineqartumik naalakkersuisunngortitsisinnaanerluni misissorniarlugu oqarnikuuvoq. Taamaaliorpallu Atlantikup avannaani qinikkat aalajangiisuunissaat pisariaarutissaaq.

AAMMA ATUARUK Aaja aamma Aki-Matilda ministeriuneq isumaqatigiinniarfigissagaat: Allannguisoqarnissaa piumasaraat

Mette Frederiksen Folketingimi partiinut isumaqatigiinniarluni ullumi aallartippoq. 

Aamma Siumumeersoq Aki-Matilda Høegh-Dam ataatsimeeqatiginnereerpoq.

- Siumup Mette Frederiksenimik qinersinerup kingorna aallartinissaataasumik oqaloqatiginnilernera siullertut nuannaarutigaara. Kalaallit Nunaata angusaqarluarnissaanut tamanna neriulersitsivoq , Aki-Matilda Høegh-Dam oqarpoq.