Mette F. siammasissumik naalakkersuisoqatigiiliortoqarsinnaa-nissaanut isumalluartoq
Ministeriunerugallartup Mette Frederiksenip, Danmarkimi nutaanik naalakkersuisoqatigiiliornissaq pillugu isumaqatigiinniarnerit Marienborgimi ullumi tallimanngornermi aallartippai, partiillu Folketingimiittut assigiinngitsut ataatsimeeqatigalugit.
Venstrep siulittaasuata Jakob Ellemann-Jensenip siammasissumik naalakkersuisoqatigiiliortoqarsinnaanissaa qularnartoqartittuarsinnarpaa, minkinillu toqoraasoqarnerata eqqartuussissuserisumit misissorneqarnissaa Moderatit siulittaasuata Lars Løkke Rasmussenip piumasaraa.
Danmarkimi partiit qiterliit peqatigalugit siammasissumik naalakkersuisoqatigiiliortoqarnissaa pingaarnertut anguniassallugu, Mette Frederiksenip Folketingimut qinersisoqarnissaanut oktobarip ulluisa tallimaanni nalunaaruteqarnermi oqaatigaa.
Siammasissumillu naalakkersuisoqatigiiliortoqarsinnaanissaanut ministeriunerugallartoq isumalluarpoq, kikkulli naalakkersuisoqatigiilersinnaassanerlugit Mette Frederiksenip suli oqaatigisinnaannginnerarpaa.
AAMMA ATUARUK Mette Frederiksenip naalakkersuisoqatigiiliornissamik isumaqatigiinniarnerit aallartissagai
Partii Venstre oqaloqatigineqartussani siullersaavoq.
Venstrep siulittaasua Jakob Ellemann-Jensen akunneq ataaseq oqaloqatigiittoqareersorlu siammasissumik naalakkersuisoqatigiiliortoqarsinnaanissaa suli qularutigaa.
Venstre Socialdemokratit peqatigalugit naalakkersuisoqatigiiliornissamut peqataasinnaanngitsoq, Jakob Ellemann-Jensenip qineqqusaarnerup nalaani oqaatigaa.
Siammasissumillu naalakkersuisoqatigiiliortoqarsinnaanissaanut qularnini tallimanngornermi attappaa.
Moderatit siulittaasuat Lars Løkke Rasmussen isumaqatigiinniarnernut ullumi aamma peqataavoq.
Siammasissumik naalakkersuisoqatigiiliortoqarsinnaanissaa ammafffigalugu taassuma qineqqusaarnerup nalaani oqaatigaa, Mette Frederiksenilli minkinik toqoraasoqarnerata eqqartuussissuserisumit misissorneqarnissaanut akuersinissaa piumasaralugu.
Isumaqatigiinniarnerit siulliit naammassereersullu piumasaqaat tamanna suli attappaa.
