Mette Frederiksenip naalakkersuisoqatigiiliornissamik isumaqatigiinniarnerit aallartissagai

Folketingimut qinikkani 103-t Mette Frederiksenip isumaqatigiinniarnernik aqutsisuunissaanut tikkuussipput. Taassuma naalakkersuisoqatigiiliornissamik isumaqatigiinniarnerit aqagu tallimanngornermi aallartissavai.
Mette Frederiksen kunngip naalakkersuisussarsioqqusaatut ippassaq pingasunngornermi toqqagaareerluni, dronningip illussaarsuaniit Amalienborgimiit anisoq. Assi © : Philip Davali/Ritzau Scanpix
Allattoq Ritzau
novembarip 03-at 2022 08:56
Nutserisoq Mads Lynge

Danmarkimi naalakkersuisoqatigiiliornissamik isumaqatigiinniarnerit, ministeriunerup atorfilittut najugarisaani Marienborgimi aqagu tallimanngornermi aallartissapput.

Ministeriunerugallartoq Mette Frederiksen (S) TV 2-mut taama oqarpoq.

Folketingimi amerlanerussuteqartut Socialdemokratit, Moderaterne, SF, Enhedslisten, De Radikale kiisalu Alternativet - katillugit 103-nik ilaasortallit - Mette Frederiksenip isumaqatigiinniarnernik aqutsisuunissaanut tikkuussipput. Kunngikkormiut taama nalunaarput.

AAMMA ATUARUK Dronning Margrethep ministeriuneq Mette Frederiksen ullaaq manna tikilluaqquaa

Danmarkimi siammasissumik naalakkersuisoqatigiilertonissaa Socialdemokratit qineqqusaarutigaat, tamannalu anguniarlugu Kunngip naalakkersuisussarsioqqusaatut Mette Frederiksenip isumaqatigiinniarnerit aallartinniarpai.

- Folketingimi partiit ataasiakkaarlugit - soorunalumi Atlantikup avannaanit ilaasortat Marienborgimut tallimanngornermi qaaqquniarpagut. Partiit angissusaat naapertorlugit aggersarneqassapput, Mette Frederiksen TV 2-mut oqarpoq.

Partiit saamerliit Folketingimut qinersinermi katillugit 90-inik ilaasortaatitaqalerput, amerlanerussuteqalerlutillu. Siammasissumilli naalakkersuisoqatigiilertoqarnissaa, Mette Frederiksenip taamaattoq ujartorniarpaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq