Dronning Margrethep ministeriuneq Mette Frederiksen ullaaq manna tikilluaqquaa
Dronning Margrethep ministeriuneq Mette Frederiksen, Danmarkimi ullaap tungaani nalunaaqutaq aqqanermut, tassa nunatsinni massakkut nalunaaqutaq arfineq-marlunngortoq tikilluaqqussavaa. Mette Frederiksenip qinersinermi inernerit partiillu inissitsititernerat pillugit dronningimut tassani ilisimatitsissutigissavai.
Kunngikkormiut nittartagaanni tamanna atuarneqarsinnaavoq.
AAMMA ATUARUK Aki-Matilda Høegh-Dam taaguunneqartupilussuaq – Aaja Chemnitz ikinnernit taaguunneqartoq
Danmarkimi folketingimut marlunngornermi qinersisoqarpoq, partiillu saamerliit amerlanerussusiinissamut ilaasortat 90-it tassani pissarsiarivaat. Savalimmiuni saamerlerneersoq ataaseq, Kalaallit Nunaanniillu ilaasortat marluk, Mette Frederiksenip ministeriunertut naalakkersuisoqatigiiliorsinnaanissaanik tapersersuisut.
Danmarkimi qiterpasissumiittut peqatigalugit siammasissumik naalakkersuisoqatigiiliornissaat Socialdemokratit qineqqusaarutigaat.
Danmarkimi naalakkersuisut tunuarniarnerat, dronningimillu pingasunngornermi oqaloqateqarniarnerat, ministeriunerup partiit siuttuisa unnuaq apeqqarissaarfigineqarneranni oqaatigaa.
- Maanna taama iluseqartillugu naalakkersuisut amerlanerussuteqarunnaartut paasinarsivoq. Tamanna pissutigalugu naalakkersuisut tunuarniuteqarnerat dronningimut nalunaarutiginiarpara, Mette Frederiksen oqarpoq.
- Siammasissumik naalakkersuisoqatigiiliortoqarnissaa Socialdemokratit qineqqusaarutigaat. Partiillu akornanni amerlanerussuteqartut kunngip naalakkersuisussarsioqqusaatut toqqassappannga taamaaliortoqarsinnaanersoq misissussavara, ministeriuneq oqarpoq.
Partiit saamerliit partiilu Moderaterne Mette Frederiksen kunngip naalakkersuisussarsioqqusaatut tikkuarpaat.
Ministeriunerugallartoq, ministeriuneqarfillu isumaqatigiinniarnerni siunnersortaasarput.
Naalakkersuisoqatigiiliornissamullu amerlanerussusiisoqarsinnaanngippat dronningimik oqaloqateqaqqittoqartariaqassaaq.