Sara Olsvig ICC-mi tamarmi siulittaasunngortoq
![](/sites/default/files/styles/image_934x467/public/article_images/20180424-070412-l-1920x1281we.jpg?itok=A8WVy2Gk)
Sara Olsvig ICC-mi tamarmi siulittaasunngorpoq.
Inuit Circumpolar Council (ICC) tusagassiutinut taama nalunaarpoq.
Sara Olsvigip Dalee Sambo Dorough Alaskameersoq kingoraarlugu maannamiit 2026-p tungaanut siulittaasuussaaq.
- ICC 1977-imi pilersinneqarmalli siunnersuisoqatigiiffiup inuit nunaanni nunagisatta eqqissinermuinnaq atorneqassasut anguniagaraarput, Sara Olsvig oqarpoq.
- ICC naalakkersuisunut attuumassuteqanngilaq, inuillu issittormiut soqutigisaat pisinnaatitaaffiilu sorsuutigivai.
- ICC-p inuit 180.000-t Alaskameersut, Canadameersut, nunatsinneersut Tjukotkameersullu (Rusland) sinniisuuffigai.
Illersornissamut, peqqissutsimut atugarissaarnermullu tunngasut ICC-p ukiuni sisamani tulliuttuni sulissutissaasa pingaarnersarissavaat, taamatuttaaq inuusuttut salliutinneqarnissaat siulittaasunngorlaap pingaartippaa.
Sara Olsvigimmi sulissutigerusuppaa, ICC-p sulineranut inuusuttut akuutinneqarnerunissaat.
- Inuusuttut ICC-mut sunik tunniussassaqarpat? Aammalu inuusuttut inuit pisinnaatitaaffiinik sulinermi misilittagaqarnerulernissaat anguniarneqartariaqarpoq, Sara Olsvig oqarpoq.
Sorsunnerup kinguneri
Siulittaasutulli atuutilerneq suliassarpassuaqarpoq.
Ukrainemi sorsuttoqarnera ICC-p issittormiunik suleqateqarniarneranut akimmisaartitsivoq. Issittumimi siunnersuisoqatigiit ukkatarerusutaat silap pissusaa aammalu piujuartitsilluni ineriartortitsineq maanna uninngavoq.
- Qularutissaanngilaq, issittoq aammalu nunap inoqqaavi maanna imaannaanngitsunik aqqusaagaqassapput. Ilaqarpugummi naggueqatitsinnik Ruslandimi najugaqartunik, taamaattumik taakkununnga suleqatiginninniarnerput imaaliallaannagassaanngilaq, taakkununngami atassuteqalernissatta tungaanut ukiut 40-t piffissamik atuiffigisimavarput, Sara Olsvig oqarpoq nangipporlu:
- Taamaattumik qularutissaanngilaq, ukiut aggersut pissaanilissuit aaqqiagiinnginnerillu maanna pisut uagutsinnut aamma initujumaartut, Sara Olsvig oqarpoq.
- Issittoq angerlarsimaffigigatsigu nalunngeqaarput – aamma nalunngilarput Inuit Nunaat tassaasoq akornatsinni suleqatigiiffiulluni, oqaloqatigiittarfiulluni isummanillu paaseqatigiiffiulluni aalajangigassanik inerniliisarfiusoq. Anersaaq tamannarpiaq toqqammavigalugu Inuit Issittormiut Siunnersuisoqatigiiffiat pilersinneqarpoq, tamannarpiarlu toqqammavigalugu sulinerput ingerlateqqissavarput, siulittaasunngortoq oqarpoq.
Inuit 66-it ataatsimeersuaqataasut
Sara Olsvig nunatsinniit ICC-mi tamarmi siulittaasuusut pingajoraat.
Hans-Pavia Rosing tassani 1980-imiit 1986-ip tungaanut siulittaasuuvoq.
Aqqaluk Lynge aamma tassani marloriarluni siulittaasuuvoq, siullermik 1997-imiit 2002-mut kingullermillu 2010-miit 2014-imut.
ICC 14-issaannik ataatsimeersuaqqammerpoq.
Inuit 66-it Alaskameersut, Canadameersut, nunatsinneersut Siberiamilu Tjukotkameersut nittartakkakkut attaveqaatitigut marlunngornermiit sisamanngornermut pisumi ataatsimeersuaqataapput.
AAMMA ATUARUK Sara Olsvig: USAp nunatsinnut kammalaataarusunnini qulakkeerusuppaa
“Inuit – Pertujaassuseq Eqqisseqatigiinnerlu” qulequtarineqarpoq. Nunani tamalaani nunap inoqqaavisa pisinnaatitaaffiinut nunallu tamalaat akornanni suleqatigiinnermut, inuussutissaqarniarnermut, ilaqutariinnut inuusuttunullu, peqqinnissamut inuunerissuunermullu, ilinniartitaanermut oqaatsinullu taavalu nunap inoqqaavisa ilisimasaasa atorneqarnissaannut tunngasut ataatsimeersuarnermi oqallisineqartut, ICC-p tusagassiutinut nalunaarutaani allaqqavoq.
- Ullumikkut pisuussutilerngusaannermi Issittumut sunniutaasut peqqutigalugit pingaartipparput innuttaqatitta nukittuumik inissisimanissaat pingaartitattalu nunagisatsinni ataqqinartumik eqqissinermillu nassataqartumik atugaajuarnissaat, ICC-mi tamarmi siulittaasuujunnaartoq Dalee Sambo Dorough oqarpoq.
ICC-p 15-issaannik ataatsimeersuarnissaa Canadami 2026-imi pissaaq.
Inuit Circumpolar Councilip Issittumi nunani inuit 180.000-t sinniisuuffigai, inuillu issittormiut soqutigisaat pisinnaatitaaffiilu sorsuutigivai.
- Sara Olsvig 43-nik ukioqarpoq. Taanna nunatta USA-llu atassuteqarnerannut tunngasumik Ilisimatusarfimmi ph.d-nngorniarpoq.
- 43-nik ukioqarpoq.
- Kuupik V. Kleist kingoraarlugu Inuit Ataqatigiinni 2014-imiit 2018-ip tungaanut siulittaasuuvoq.
- Folketingimi 2011-miit 2015-ip tungaanut ilaasortaavoq.
- Naalakkersuisut siulittaasuannut 2016-imi oktobarimi tullersortinngorpoq taavalu isumaginninnermut, ilaqutariinnut, naligiissitaanermut inatsiseqarnermullu naalakkersuisuuvoq.
- Inatsisartuni 2013-imi ilaasortanngorpoq.
- Sara Olsvig kulturimut inuiaqatigiillu oqaluttuarisaanermut tunngasumik Ilisimatusarfimmi bacheloriuvoq Købehavns Universitetimilu antroplogitut ilinniarsimavoq.