Sara Olsvig: USAp nunatsinnut kammalaataarusunnini qulakkeerusuppaa
Sapaatip akunnerata siuliani Avannaata Kommuniani borgmesteri attaviitsoq Palle Jeremiassen USAp nunatsinni takornarialerinermi sulialinnik 20-nik USA-mut paasisassarsioriartoqqusilluni qaaqqusissutaanut akuersivoq. Taakkulu angalanissaat USAp akilerpaa taarseeqqusinngillallu.
USAp qaaqqusinera tupaallaatissaanngitsoq Sara Olsvig naliliivoq, taanna Ilisimatusarfik aqqutigalugu nunatta USA-mik sanileqarnera ilisimatusarfigaa, taannalu naliliivoq qaaqqusissut takornariaqanermuinnaq tunngassuteqanngitsoq.
- Oqarsinnaavugut, nunatta USAllu akornanni isumaqatigiissutaasut maanna kommuneni atorneqalersimasut.
- Tamannalu eqqumiippallaanngilaq, taanna oqarpoq.
Soorliuna USA nunatsinnut taamak soqutiginnitsigisoq?
AAMMA ATUARUK Aatsitassalerinermik Ilinniarfimmut 7.5 millioninik aningaasaliisoq
Siorna USA Nuummi konsuleqarfittaarpoq.
Tamatumalu kingorna tapiissutinik arlalinnik tapiisarpoq. Ilaatigut soorlu USA nunatsinni suliniutinut 93,4 millioni koruuninik tapiissuteqarpoq taakkulu nunatta USAllu akornanni nukittunerulersitsinissamik siunertaqarput, ilaatigut soorlu takornariaqarnerup iluani.
Taamatuttaaq Aatsitassarsiornermi ilinniarfimmut Sisimiuniittumut taakku ilaat tupput, aningaasallu ilaat ilinniartitaanerup iluani ineriartortitsinermut aamma tussallutik.
Amerikamiulli iliuusaat takornariaqarnerinnarmut tunnganngitsoq, Sara Olsvig naliliivoq.
Saniligut marseqqissaarput
Ukiut qulikkaat kingulliit Kalaallit Nunaat malunnaateqarluartumik ineriartorpoq, siullermik Namminersornerullutik Oqartussat eqqunneqarpoq taavalu tulliani Namminersorlutik Oqartussat eqqunneqarluni.
Namminersorlutik Oqartussat inatsisaat naapertorlugu siunissami nunarput naalagaaffinngortinniarneqarpoq, ineriartornerlu taanna nunap sanilerisatta alaatsinaaqqissaarpaa.
- Amerikamiut malinnaapput, nalunngilaat pissutsini taamaattuni pingaartuusoq Kalaallit Nunaata kammalaatigilluarneqarnissaa aammalu suleqatitut isiginissaa, oqaluttuarisaanerummi iluani takuneqarsinnaavoq, USAp isumannaallisagaaneranut Kalaallit Nunaata qanoq pingaaruteqartiginera ilisimaneqarpoq, Sara Olsvig oqarpoq.
AAMMA ATUARUK USA nunarput suleqatigalugu millioninik arlalinnik aningaasaliiniartoq
Nunarsuup inissisimanera naapertorlugu issittumi nunatta inissisimanera Amerikap avannaata sanileraa, taamaattumillu USAmut pingaaruteqarpoq nunarsuup sinneranut malugitissallugu USAp issittumut qanittumiinnera.
Pingaartumik nunanut pissaanilissuarnut soorlu: Ruslandimut Kinamullu tamatuma malugineqarnissaa pingaartuuvoq. Rusland sakkutooqarfissuuvoq timmisartoqarfippassualik, Kina nunani issittuni suliniuterpassuarnut tapiissuteqartarpoq. USAlu unammiuaartuuvoq, Sara Olsvig naliliivoq.
- Taamaammat USA-p takutikkusuppaa oqarniartutut illuni: Uagut aamma issittumiippugut issittormiuulluttalu.
