Sangusajaartut: Inatsisartut isumalioqatigiissitamiinnertik akissarsiaqaatiginngiinnassagaat

Akissarsiaqalernissat akissarsiaqalinnginnissaalluunniit assortuussutigineqarmat siunnersuutit allanngorarput. 

Tunngaviusumik inatsisissaq pillugu isumalioqatigiissitamut tunngasunik pingasunngormat pisut taama oqaluttuarineqarsinnaapput. Anita Hoffer isumalioqatigiissitami ilaasortatut ippassaq tunuarmat tamatumalu kingorna Suleqatigiissitsisut sinniisuutitaat, Louis Sigurdsen, aamma tunuarmat aalassanneqalaavissorpoq.

Isumalioqatigiissitami ilaasortat tassani sulinerat ukiup affaanik sivitsorneqartussanngornerata ilutigisaanik ukiortaamiit akissarsiaqalernissaat Naalakkersuisut aalajangereeraallu taama pisoqarpoq.

Tamanna isumalioqatigiissitami ilaasortat politikeritut sulinerminni akissarsiaqarnermik saniatigut isumalioqatigiissitami ilaasortaanerminni ukiortaamiit akissarsiaqalernissaannik kinguneqarpoq. Tamannali Anita Hofferip Louis Sigurdsenillumi akuersaarusunngilaat.  

- Takorloorakku isumalioqatigiissitami ilaasortat tapersiiniarlutik suleqataarusuttut suleqataanissaq kajumigilerpara. Uangami taamatorpiaq tunngaveqarlunga ilaasortanngorpunga, Anita Hoffer oqarpoq.   

Politikerit akissarsiaqalernissaat pingaarnersiuinerlunnerusoq

Nalakkersuisoqatigiit aningaasanut inatsisissap isumaqatigiinnniutigineqarnerani aningaasanik pingaarnersiueriaasiat, Suleqatigiissitsisut isornartorsiorpaat, politikerillu imminnut qaavatigut aningaasarsialeqqinniarnerat assuareqaat.

- Takusinnaavagut aningaasat suminngaanniit tiguneraat. Peqqinnissaqarfik aningaasaliiffigineqarluanngilaq. Meeqqat inuusuttuaqqallu ikiorneqarluanngillat. Aamma meeqqat atuarfinni nerisarnerat unitsinniarpaanngooq. Taava qiviariarutsigu, aningaasanukua sumut nuukkaat? Imminnut akissarsitinniarlutik sulipput. Taanna akuerisinnaanngilarput, Suleqatigiissitsisuneersoq Louis Sigurdsen oqarpoq.

Taannalu Inatsisartut ilaatigut sukkunut, mamakujuttunut, imigassanut tupanullu akitsuutinik qaffaaqqammernerannut aamma akerliuvoq. 

AAMMA ATUARUK Vittus akitsuutit pillugit: Aap, annernarput pisariaqarpulli

Isornartorsiuinera Aningaasaqarnermut Naalakkersuisup, Vittus Qujaukitsup, tunngavissaqarsorinngilaa.

- Imatut oqartoqarsinnaanngilaq; immikkuualuttuarannguaq una uuma akilerpaa. Naamik. Aningaasanununa inatsit tamatta ataatsimoorluta nammatassarigipput, taanna oqarpoq.

Partii ikorfartortaasoq tapersiinngitsoq

Isumalioqatigiissitami ilaasortat akissarsiaqalernissaannut malittarisassat amerlanerussuteqartunit akuerineqartussaanerat, taassuma erseqqissarpaa.

- Inatsisartummi tunngaviusumik inatsisissaq pillugu isumalioqatigiissitami ilaasortat qanoq ittunik atugaqarlutik sulissanersut naggataatigut aalajangigassaraat. Tamannalu aningaasanut inatsisissap inaarutaasumik akuerineqarnerani pissaaq, taanna oqarpoq.

AAMMA ATUARUK Akitsuutinut nutaanut akerliusut: Pissakinnerusut ilungersortut eqqugaaqqipput

Inatsisartullu isumalioqatigiissitami ilaasortat akissarsiaqalernissaannut akuersaartut amerlanerussuteqarpasinngillat. Partiimi ikorfartortaasoq, tassa Demokraatit, tamatumunnga tapersiinngillat.

- Inatsisartut isumalioqatigiissitami aallaqqaataanilli ilaasortaasut aningaasarsiamik saniatigut pinnaqqinnissaannut akerliuvugut, Demokraatini siulittaasuugallartoq Nivi Olsen oqarpoq.

Taamaattumik tamannarpiaq pissutaagunarluni allannguutissatut siunnersuummik saqqumiisoqarpoq, oqaasertat inatsisartut isumalioqatigiissitami ilaasortat akissarsiaqalernissaannut tunngasoq tamatumani peeqqinneqarsimalluni.

Tamatuma saniatigut tunngavisumik inatsisissaq pillugu isumaqalioqatigiissitami sulineq sivitsorneqartussanngorpoq, tamatumunngalu atatillugu 2,3 millionit koruunit 2021-mut immikkoortinneqarput.

2021-mut aningaasanut inatsisissaq pilersaarutit malillugit ullumi akuerineqassaaq.