Sandi Chan Iqalunneersoq mittarfimmi isumannaallisaanermi ajornartorsiuteqartoqarnerata kingorna angalanerussasoq
Sandi Chan Iqalunneersup ulluni sisamani nunatsinniinnermini Nuummi "nuannisarsimanerarpoq". Nuummili mittarfimmi nutaami isumannaallisaanikkut ilungersunartoqarnera pissutigalugu nuannisarnera ajoquserneqarpoq angalaneralu ullunik arlalinnik kilometerinillu tusindilinnik sivitsorneqarpoq.
Taannami Canadami Nunavummi Iqalunnut timmisartoqataasussallu allat timmisartussaat isumannaallisaanermi ajornartorsiuteqarneq pissutigalugu taamaatinneqartoq pingasunngornermi nalunaarfigineqarput.
Angallannermut Aqutsisoqarfiup mittarfimmi nakkutilliinerata kingunerisaanik nakkutilliiffimmi maanna atuuttumi isumannaallisaanerup pitsaassusaa nunanut allanut timmisartuussinerit akuerineqarnissaannut naammanngitsoq paasineqarpoq.
- Uggornartorujussuuvoq. Tamanna naatsorsuutiginngikkaluarpara. Maani avannaani angalangaatsiartarpunga, sila pissutigalugu kinguaattoorneqarajuttarpoq, kisianni sila pitsanngorniariartoq nutaamik aallarfissaqalertarpoq. Taamaammat ilungersunartut uku uissuummissutigingaatsiarpakka, Sandi Chan angalanissaminut pissutsit pillugit oqarpoq.
Marloriarluni atlantikoq qulaatissagaa
Sandi Chan Nuummiit nunanut allanut timmisartuussinerit unitsinneqarnerat pissutigalugu Kangerlussuakkoorluni Københavnimukassaaq tallimanngornermullu unnuissalluni. Tamatuma kingorna nunaminut Canadamut Montrealimut ingerlaqqeriarluni Ottawamut ingerlaqqissaaq, ullunilu marlunni unnueriarluni Iqalunnut aggustip 18-iani aatsaat tikissalluni.
Tassa imaappoq toqqaannartumik angalasussaagaluarluni maanna angalanissaa ulluni sisamanik sivisussuseqalerlunilu atlantikoq marloriarlugu qulaattussanngorpaa. Ikersuaq Davisikkoorluni akunnialuinnarnik sivisussuseqartumik angalasussaagaluarpoq.
Iqaluit Nuullu akornanni aqqut ukioq manna juunimi ammarneqarpoq, tamannalu Air Greenlandip aasaq manna iliuuserisaani pingaartut ilagaat, Sandi Chanilli pissutsit issittumi sumiiffiit marluk akornanni angalanissamik inniminniinissamut kajumiginninnginnerulersitsinissaa ernumassutigaa:
- Ikinngutikka amerlasuut nipilersortartuusut eqqumiitsuliortartuusullu aasaanerani kulturikkut avitseqatigiinnissaq pillugu Iqaluit Nuullu akornanni angalanikuupput, Iqalunneersorpassuarnillu maani aamma naapitaqarpunga.
- Kisianni inuit Nuummut angalanissaminnik inniminniinissamik isumaliutiginneqqeqqaartariaqalernissaat ilimagaara, taanna oqarpoq.
Aqqutip qaqugu ammaqqinnissaa naluneqartoq
Sandi Chanip nunatsinnit aallarneq ajuleqqalluni nunatsinniinnini pilersaarutaasumit sapaatip akunneranik sivisunerulerpasittoq uggoraa.
- Ajussutigaara, ikinngutima qimmianik paarsisussaagaluarpunga. Maannali qimmimik paarsiartumut sianertariaqarnikuuvunga. Aamma aqagu sulileqqittussaagaluarpunga – suliartorsinnaanngilangali, taanna nassuiaavoq.
Greenland Airports mittarfimmik ingerlatsisup, isumannaallisaanerup aaqqiivigineqarnissaanut akisussaaffeqartup kukkussutaasup paasineqarneranut akisussaaffik tamaat tiguaa, iluarsiivigineqarnissaallu sulissutigingaatsiarlugu.
