Atualeqqaartut naatsorsuuteqarluartut
Atualeqqaarnermi erfalasoqarpoq, qalipaateqarpoq naatsorsuuterpassuaqarlunilu ukioq mannalu 1. klassinngortut Nuummi Atuarfik Inussummut ornigukkamik piunngitsoqanngilaq.
Atuartut nutaat pissanngallutik angajoqqaatillu isullutik takkummata KNR najuuppoq, atuaqatertaatillu ataatsimoorlutik ingerlagamik aamma pissanngapput.
Atuarfik Inuussup isaariaata pingaarnerup saani angajoqqaat meeqqallu imminnut qanerrapput. 1. klassinngortut saqqummiunneqarmata qiimmattartoqarpoq, avaalasoqarpoq tamatigullu tamaani ersaattaattoqartarluni. Erfalasorput aggustimi anorip nillertup erfalatippaa. Angajoqqaallu tulluusimaarrattut meeqqatik atualeqqaartut assilisaarpaat.
‘1.C, 1.C, 1.C’ angajoqqaat ilaquttallu allat atualeqqaarnermut peqataajartortut qiimmattaarlutik suaartarput.
- Qilanaartorujussuuvunga, Inuik Andersen 1.C-ni atualertoq oqarpoq.
Atualeqqaartoqarnissaanulli suut tamarmi nalunanngeriinngillat. Ullormi atualeqqaarfissaq atuanngiffeqarnerup ingerlanerani allanngortinneqarpoq, tamanna ilaasa nalliuttorsiutiginninnissaannut kinguaattoortitsivoq.
- Atualeqqaarfissap allanngortinneqarnerani pilersaarutigut 29-anut nuutsinnikuuagut. Taamaammat qaaqqusagut kalaalimerngillu aatsaat aqagu tikissapput. Ullumikkut peqataanissaminnut angumersinngillat, Paninnguaq Miunge 1.D-nngortumik ernilik oqarpoq.
Qanoq ippa?
- Naammagittaannartariaqarpugut, taanna oqarpoq.
Inuik Andersenip atuaqatini ukioqatinilu allat peqatigalugit Atuarfik Inussuup piareernissaata tungaanut Atuarfik Ukaliusami atuassapput.
- Pakatsinalaarpoq uippakajaarnarlunilu. Ullormummi piareersarnikuuvugut, ilaquttagut sineriammiittut taamaalillutik aamma peqataasinnaassallutik – taamaammat pakatsinalaarpoq, Inuiup arnaa Rakel Andersen oqarpoq.
Inuik allallu angajoqqaarpassuit ilaqutarpassuillu najuukkiartortut sanioqqullugit Atuarfik Ukaliusami atuarfissaminnukassapput.
Naak atualeqqaarfik atuarfiup pisortaata Uffe Lilholmip takorluugaatut inngikkaluartoq taassuma tikilluaqqusilluni oqalugiarnermini atuarfiup takorluugai anguniagaalu oqaatigai.
- Ullumi ulloq angisuujuvoq, sanasut, innuttaasut ilinniartitsisullu atuarfiup matuma atualeqqaarnissarsilu tunngavileeqataaffigaat. Atuarfik Inussuk ukiuni qulini suliarineqarpoq, taanna oqarpoq.
Piffissarlu Inussuttut pinngortitamiittutulli ujararpassuarnik alliartortinneqartutulli meeqqat ilisimasaannut ineriartortitsiffiusussaq maanna takkuppoq, taanna oqarpoq.
- Atuartulli isorniartumik eqqarsarsinnaalersinneqarnissaat assersuutigalugu inoqatinut attaveqaatitigut ullutsinni initungaartuni eqqortunik eqqunngitsunillu immikkoortitsisinnaalernissaat kissaatigaarput, Uffe Lilholm oqarpoq.
