Paul Watson Nuummi septembarip tallimaata tungaanut tigummigallarneqassasoq
Avatangiisinik illersuiniaq, Paul Watson Nuummi tigummigallarneqaannassaaq.
Angutip tigummigallarneqarnerata septembarip tallimaata tungaanut sivitsorneqarnissaani nuantsinni Eqqartuussisoqarfimmit aalajangerneqarpoq.
73-inik ukiulik, avatangiisinik illersuiniaq juulip 21-aniilli tigummigallarneqareerluni ullaap tungaani sassartinneqaqqippoq. Taanna umiarsuaminnik Nuummut orseriartorneranni juulip 21-ani ullaakkut tigusarineqarpoq.
Tassa imaappoq Watson sapaatini akunnerni pingasuni suli tigummigallarneqassaaq - Kalaallit Nunaanni Politiit oqarnerat naapertorlugu "taassuma tunniunneqarnissaanut apeqqummut aalajangiisoqarnissaata tungaanut najuunnissaa qulakkeerniarlugu" taama aalajangiisoqarpoq.
Sapaatit akunnerilu pingasut unnerluussisussaatitaasut tunngavilersuutigaat. Unnerluussisussaatitaasut pisortaat, Mariam Khalil oqarpoq:
- Naammagisimaannginnissatsinnut tunngavissaqanngilagut. Japanimit tunniusseqqusissuteqarpoq, qimaanissaanullu aarlerinartoqarluni, taanna KNR-imut oqarpoq.
Watsonip aalajangiineq Nunatta Eqqartuussisuuneqarfianut ingerlateqqitassanngortippaa, tassangalu suliamut atatillugu aalajangiisoqarumaarpoq.
Japanimut Watson tunniunneqartinniaraa
Taassuma illersuisuata ullumikkut eqqartuussivimmi suliaq naammagisimaanngilluinnarpaa.
- Uppernarsaatinik videoliamillu ullumikkut eqqartuussinermi tigummiatsinnik takutitsisinnaatitaannginnerput akuersaarneqarsinnaanngissoraarput, Julie Stage oqarpoq.
- Oqalutsimik nutserisinnaasumik najuuttoqannginnera aamma akuersaarneqarsinnaanngissoraarput. Inatsiseqarnermut ministereqarfiup Japanimit tunniussisoqarnissaanut piumasaqaat erngertumik itigartitsissutigissagaa kaammattuutigaarput. Sullitarput pinerluuteqarsimasutut pinerluuteqarsimasunullu paffequtilerluta aamma ingerlanneqassanngilaq.
Paul Watson inummut allamut ajoqusiisimasutut ilaatigut pasineqarpoq – tamannalu Japanimi ukiuni 15-ini parnaarussaanermik pillaatissiissuteqarfiusinnaavoq.
- Paul Watsonimut pasilliutigineqartut tutsuiginanngillat, piviusumillu tunngavissaqaratik. Japanimit isumassarsiaavoq siunertaqartoq, tassalu Paul Watsonip illersuineranik unitsitsineq, taanna eqqartuussiviup silataani oqarpoq.
Japanimut tunniunneqarusunngitsoq
Canadamiu-amerikamiu avatangiisinik illersuiniaq Japanimit nunanut tamalaanut tigusarinneqqussut 2010-meersoq pissutigalugu Nuummi talittarfimmi juulimi ullaakkut tigusarineqarpoq. Danskit politiivi tigusarinninnermut ikiuupput.
Japanimiut arfanniat Sikuiuitsoq Kujallermi arfanniarneranni Watsonip akuliunnerata kingunerisaanik Japanip taanna eqqartuussissutigoortinneqarpaa.
Japanimimi oqartussat avatangiisinut illersuisoq arfanniarnut saassussisimasoraat taakkulu arfanniarniarnerannut akornusiisimasoralugu.
Watsonip tunniunneqarnissaa Japanip Danmarkimut piumasaraa. Tamannalu Inatsiseqarnermut ministereqarfiup aalajangiiffigisussaavaa.
Watsonip tunniunneqarnissani kissaatiginngilaa, taassumalu eqqartuussissuserisuisa tunniunneqarnera EU-mi isumaqatigiissutinik unioqqutitsinerussasoraat.
Sullualukkooriartortoq
Paul Watson japanimiunut arfannianut akornusersuiartoqqinniarluni juulip 21-ani tigusarineqarpoq. Taanna Nuummi orseriarluni Sullualukkoorluni angalaniaraluarpoq.
Watson Greenpeace-imik pilersitseqataasuuvoq, taannali tassunga ilaajunnaarnikuuvoq, suliniuteqatigiiffimmillu Captain Paul Watson Foundationimik pilersitsisuuvoq.
