Sanasut amigaataalluinnarput
Nuummi suliffeqarfiit ilaata GGC-p, sanasunik nunanit allaninngaanneersunik tikisitsisimanera, kalaallinillu soraarsitsisimanera Kalaallinik nikaginninniarnerusoq, SIK-mit nalilerneqarpoq. Pisimasut misissoqqissaarneqassasut SIK-p siulittaasua Jess G Berthelsen oqarpoq.
- Tallimanngormat GGC-p tusagassiutitigut nalunaarutigaa eqiasummatagooq, imerajuttuummatagooq soraarsitaasut. Taamaattoqanngilluinnaqqissaarpoq, taamaattumik nunatsinni sulisartunik nikassaallunilusooq imigassamik ajornartorsiuteqarnerarlugit avataaninngaanniik tikikisitsisarneq akuersaarneqarsinnaanngilaq. Paasiniarniarparput, ilumut taakkua Polenimiut akuersissummik peqarnersut, taavalu aamma paasiniassavarput, GGC, sinerissami sulisussanik piniarsimanersoq, taamaanngippallu inatsisit malillugit malersorneqassaaq, inatsisillu malissimanngippagit pineqaatissinneqassaaq.
Taama oqarpoq SIK-p siulittaasua Jess G Berthelsen. Namminersornerullutik oqartussani sulisussanik tikisitsisarnermi inatsit sukaterneqartariaqartoq Jess G Berthelsen aamma isumaqarpoq, taassumalu saniatigut Nuummi suliffissaqarnermut ataatsimiisitaliaq suliaminik nakkutiginninnera naammaginannginnerarpaa. Sulisitsisut kattuffianni GA-mi siulittaasoq Ole Rud oqarpoq sanasunik pissarsisinnaaneq nunatsinni ajornarluinnartoq.
- Suliffeqarfiit ilaat sanasunik pissarsiniarnerinnarminni aningaasarpassuit atorsimavai, katillugumi annonce-nnarnut 50.000 koruunit atorneqarsimapput. Paasisinnaavara Nuummi sanaartortitsivik GGC sanasunik Polenimiit tikisitsisimammat. Taamaammat isumaqarpunga sanasunik amerlanerusunik Kalaallit Nunaanni ilinniartitsinissaq pisariaqarpoq, Ole Rud oqarpoq.
Ole Rud-i aamma oqarpoq GGC-p soraarsissimasaani arfiniliusuni 80 procentit danskiusut, eqiasullutik suliumasimanngitsut, taamaammat kalaaliunerinnai pillugit soraarsitsineraaneq eqqunngitsoq Ole Rud-ip erseqqissarpaa.
- Kalaallit Nunaanni Danmarkimilu sanasussarsiorneq ingerlanneqartuaraluarsimavoq, ksianni ajornavissimavoq, Ole Rud naggasiivoq.
Ole Rud aamma oqarpoq Polenimiit sanasunik tikisitsineq sanaartortitsivinnut akikitsuinnaasimanngitsoq, Polenimiullu akissarsiaat allat akissarsiaat assigiinnaraat erseqqissarpaa.
