Sakarine Olsen Müllerip meeraasa kigutaat narlorsartissinnaanngillat: Nuunnissarput pilersaarutigilerput
Meeqqavit kigutaat narlorissarneqassappat? Taava Nuummi narlorissarneqassapput.
Meeqqat 5. klassimi atuartut tikillugit pisortat akiligaannik kigutaat narlorissarneqarsinnaapput, tamannali Nuummi pissaaq. Kigutit nakorsaat immikkut ilinniarsimasut naammannginnerat pissutigalugu tamanna nunatta sinnerani neqeroorutaanngilaq.
Illoqarfiit pingaarnersaata avataani angajoqqaat tamanna pillugu qanoq iliusissaaruttarput.
- Pingasunik meeraqarpugut, taakku kigutaat narlorissarneqassapput, ukiut marluk matuma siorna saaffiginnissutitta qisuariarfigineqannginnera pissutigalugu sukataaqqittariaqarnerput pakatsinarpoq, Sakarine Olsen Müller Sisimiuneersoq oqarpoq.
Tamanna pissutigalugu Sakarine Olsen Müllerip meeqqami kigutaasa narlorissarneqarnissaat pissutigalugu iliuuseqangaatsiarnissamik isumaliuteqalerpoq. Aamma naak tamanna ilaqutariit inuunerat Sisimiuniit nuuttarisaqarnerannik isumaqaraluartoq.
- Ukiut marluk qaangiuppata nuunnissarput pilersaarutigileqqavarput. Nuummuunngitsoq Danmarkimut.
Illoqarfitsik qimakkusunngikkaat
Ilaqutariillu Danmarkimut nuunnissaat pilliuteqarfiungaatsiassaaq. Pilliutigisinnaavaalli.
- Meeqqatta ulluinnaat, atuarnerat ikinngutaallu qimattariaqassavagut. Taakku pilliutigissavagut. Uagutsinnut angajoqqaajusunut illoqarfitta qimannissaa artornassaaq.
- Periarfissaqartuuppat maani illoqarfimmiiginnarusussagaluarpunga pisariaqartitatsinnillu ikiorneqarluta, Sakarine Olsen Müller oqarpoq.
AAMMA ATUARUK Kigutinik narlorsaaneq ukiumi nutaami neqeroorutaaqqilissasoq
Taamali pisoqannginnissaa suli neriuutigaa.
- Neriulluinnarpunga illoqarfipput qimattariaqassanngikkipput. Imminut pilliutigisussaavugut. Tamannalu akisussaaq. Taamaattumik saaffiginnissutitta qisuariarfigineqarnissaa neriuutigilluinnarpara, taanna oqarpoq.
20 millionit koruunit
Aamma Sika Olsen assinganik inissisimavoq, tassa meeraata kigutaat narlorissarneqarsinnaanngillat. Taassumalu Nuummi meeqqat kisimik periarfissaqartinneqarnerat qatsuppaa.
Sika Olsen Sisiuminngaanneersoq. Assi: Dorthea Reimer-Johansen
- Tamatta akileraartarpugut, assigiimmik kiffartuunneqassaagut. Meeqqat Nuummi najugaqartut kisimik kigutaasa narlorissarneqarsinnaanerat assigiinngisitsineruvoq, taanna oqarpoq.
Nuunneq qisuariarujussuarnertut isigineqarsinnaavoq, kisianni kigutit pillugit immikkut ilinniarsimasut oqarnerat naapertorlugu meeqqat kigutit nakorsaannit nakkutigineqarsinnaappata aatsaat narlorissarneqarnissaat illersorneqarsinnaavoq.
Tamanna Naalakkersuisut 2020-mi allaaseraat.
Peqqinnissamut naalakkersuisuusimasup, Martha Abelsenip (S) “nunarput tamakkerlugu assigiimmik kigutinik narlorissaanermik neqerooruteqarneq” ukiumut 20 millionit koruunit missaannik akeqassasoq naatsorsornikuuaa.
KNR-ip meeqqanut, inuusuttunut, ilaqutariinnut peqqinnissamullu naalakkersuisoq oqaaseqartinniarsarigaluarpaa, taassumali saaffiginnissutit qisuariarfiginngilai.