Aaja Chemnitz aningaasaqarnermut naalakkersuisunngornissamut neqeroorfigineqarsimasoq

Aaja Chemnitzip Folketingimut qinigassanngorteqqinniarnani KNR-imut februaarimi oqaatigaa.

Apersorneqarnermini tassani nunatsinni politikki 'peqqinnanngitsuunerarpaa'.

- Avissaartuutitsisarpoq, taamalu inissisimanerput Kalaallit Nunaannut asanninninnut annernarpoq. Inoqarpoq pissutsinut ajortisaariniarsuaartunik, ajoraluartumik taakku politikimik suliaqarnissaq erloqinartunngortittarpaat. Tamakkununnga akiuussinnaasarsimavunga, nunarsuarmili inuunera tamatumunnga atortariaqarnerlugu ilaannikkut eqqarsaatigisariaqartarpara, imaluunniit nukikka allamut sammisaqarnissannut atussanerlugit, allanimmi piginnaasarpassuaqarama, Aaja Chemnitz februaarimi oqarpoq.

Aaja Chemnitz DR-ip aallakaatitassiaani P1-mi 'Svingdøren'-imi arfininngormat pulaartuuvoq. Taassuma naalakkersuisutut atuuffinnik 'arlalinnik' neqeroorfigineqarsimalluni oqaatigaa.

- Naalakkersuisut atuuffinnik assigiinngitsunik neqeroorfigineqarpunga, taakkuli qujaannarfiginiarlugit aalajangerpunga. Eqqarsarpunga politikkimut uteqqinniaruma uteqqinniarumaarpunga. Misilittagaqarlereerpunga, kisianni piviusumik misigisaqarnissara pisariaqartippara, Aaja Chemnitz DR-imut oqarpoq.

Aallakaatitassiortup sooq qujaannarsimanersoq aperaa.

- Taamaassappat nunanut allanut politikkimut tunngangaatsiassaaq aamma nunatsinni inuussutissarsiornermik ineriartortitsinerulernermik pilersitsinissamut. Piffissami tassani piffissaalluanngilaq, kingusinnerusukkulli taamaattoqarsinnaavoq.

Naalakkersuisunut qanimut attaveqartut marluk imminnut attuumassuteqanngitsut Aaja Chemnitzip qanoq neqeroorfigineqarsimanera maanna oqaatigaat.

Múte B. Egede (IA) Aaja Chemnitzip marsimi kaffillernerani oqalugiarami Aajap folketingimiikkunnaarnera periarfissarpassuarnik ammassisoq oqaatigaa: - Inuiaqatigiinnut nunatsinnullu uummateqarputit. Arlaatigut suliniutini nutaani nunatsinni inuiaqatigiinnut pingaaruteqartuni suleqatigeeqqissaagut. Neriusaap isua suli nassaariniarsaraarput, taanna taamani oqarpoq.

Siulersuisuunerit neqeroorutaat

Naalakkersuisut apriilip 14-ianni nikisitingaatsiarput.

Inuit Ataqatigiinnit Aqqaluaq B. Egede Aningaasanut naalakkersuisunngorpoq, Múte B. Egedelu Nunanut allanut, Inuussutissarsiornermut, Aatsitassanullu Naalakkersuisunngorluni.

Naalakkersuisuuffiilli taama agguaanneqaqqaanngikkaluarput: IA-mi siulersuisuunerit Aaja Chemnitz aningaasanut naalakkersuisutut atuuffimmik neqeroorfigisimagaat, tusarfiit marluk KNR-imut oqarput.

Aaja Chemnitzilli taanna allanit atuuffigineqarsinnaasoraa, namminerlu nunanut allanut tunngasunut inuussutissarsiornermullu suliaqarnermi sunniuteqarnerusinnaasorivoq.

KNR-ip Aaja Chemnitz saaffigaa. Taannali oqaasissaqanngilaq.

Aaja Chemnitzip siunnersuinermik suliffeqarfimmi, Inuvami nunatta Danmarkillu akornanni inuussutissarsiornermi suleqatigiinnermi tapersiinermik suliaqartumi ilaalersimalluni marlunngornermi saqqummiuppaa.

Folketingimut maanna ilaasortaasimasup suliffeqarfimmik: Make It Rain Aps-imik taaguuteqartumik pilersitsisimalluni Facebookikkut aamma oqaatigaa. Suliffeqarfik selskab.gl naapertorlugu suliffeqarfinnut siunnersuinermik aamma aqutsinermik siunnersuinermik neqerooruteqarpoq.

Issittoq pillugu ministereqarfik

Inuit Ataqatigiit Issittoq pillugu ministereqarfimmik pilersitsisoqarnissaa 2019-imi piumasaqaatigaat.

Danskit naalakkersuisuisa isumaqatigiinniarnerannut qanimut attaveqartut marluk issittoq pillugu ministereqarfimmit pilersitsinissaq maanna oqaluuserineqanngitsoq KNR-imut oqaatigaat.

Tusarfiilli pingajuata SF-ip aamma Socialdemokraatit tamarmik immikkut ministereqarfimmik taama ittumik naalakkersuisunngortitsinissamut isumaqatiginninniarnermiunngitsoq oqaluuserisimagaat paasissutissiissutigaa.

Ministereqarfimmilli taama ittumik pilersitsinissaq Danmarkimit Kalaallit Nunaanniillu tapersiisoqarnissaa ilimananngilluinnartoq tusarfiit tamarmik oqaatigaat.