Inuit Ataqatigiit folketingimut qinigassanngortitaasa sisamat ilaat, Aqqalukkuluk Fontain danskit naalakkersuisussaata ilaatut Issittoq pillugu ministereqarnissamik siunnersuuteqarpoq. Toqqorsivimmit assiAssi: KNR // Anton Gundersen Lihn

Inuit Ataqatigiit Issittoq pillugu ministerimik toqqaasoqartinniaraat

Inuit Ataqatigiit Folketingimut qinersereernermi naalakkersuisunngortitsiniarnissami aalajangiisuussaguni Issittoq pillugu ministerimik toqqaanissaq qitiusumik piumasaqaataassaaq - taannalu Nunatsinneersuusariaqarluni.

Partii tusagassiuutinut nalunaarummi ullumi taama nalunaaruteqarpoq.

Partiip folketingimut qinigassanngortitaasa sisamat ilaat Aqqalukkuluk Fontain danskit naalakkersuisussaata ilaatut Issittoq pillugu ministereqarnissamik siunnersuuteqarpoq.

- Danmark Issittumi pissaaneqartutut taaguni taava aamma Issittoq pillugu ministereqartariaqarpoq - taannalu ministeri Issittumeersuussalluni. Issittoq ukiuni makkunani annertuumik pisoqarfiuvoq. Issittorlu pillugu ilisimaarinnittut Nunatsinneersuupput, Aqqalukkuluk Fontain allappoq.

Partii Alternativet assingusumik siorna siunnersuuteqarpoq, tassalu Danmarkimi nunanut allanut tunngasunut ministereqarfiup ataani atlantikup avannarpasissuanut ministerimik pilersitsisoqassasoq.

Atuuffimmilu tassani Nunarput Savalimmiullu naalagaaffeqatigiinnerup oqallisigineqarnerani peqataalluartarnissaa qulakkeerniarlugu atuuffik Danmarkimit, Nunatsinnit Savalimmiunillu politikerimit inuttalerneqassasoq, Alternativetip ilisimatitsissutigaa.

AAMMA ATUARUK Folketingemut qinersineq pingaaruteqarpoq

Siunnersuut taamani tigulluarneqanngilaq, ilaatigut Savalimmiut nunanut allanut tunngasunut ministerianit, Poul Michelsenimit, taassuma siunnersuut ‘quianaannartutut’ taavaa.

SF-ip Kalaallit Nunaannut tunngasunut oqaaseqartartuata siunnersuut aamma isornartorsiorpaa. 

- Savalimmiut Kalaallit Nunaatalu naalakkersuisuinut ajortisaarinertut paasivara. Namminiilivinnissamut ingerlaaleruttortut akornuserniarlugit danskit naalakkersuisuinut ilanngunniarneqarput akuulersillugit. Ingasappallaarujussuarpoq, SF-imeersoq Altinget Arktisimut oqarpoq.

Inuit Ataqatigiinniilli Folketingimut maanna ilaasortap Aaja Chemnitz Larsenip issittumut ministereqarnissaanut piumasaqaat taperserpaa.

- Aalajangiisussanngussagaluarutta folketingimullu qinersinermi Kalaallit Nunaanni partiit annersaattut inississagutta taava issittoq pillugu naalakkersuisup Inuit Ataqatigiinneersuunissaa tulluassaaq, folketingimi ilaasortaq qinigassanngortittorlu Aaja Chemnitz Larsen, Sermitsiaq.AG-mut ullumi oqarpoq.

AAMMA ATUARUK Folketingimut sassartut maannamut 14-iusut

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat