Kalaalit Nunaannit oqartussaaffiit pingaaruteqartut arlaqartut Danmarkimi Folketingimit aqunneqarput Assi: KNR / Foto: Jonas Fievé

Politikkikkut naliliisartoq Folketingemut qinersineq pingaaruteqarpoq

Tusariissajunnarsivat, Danmarkimi folketingemut qinersisoqartussaammat inatsisitaarfimmi juunip ulluisa tallimaanni, kisianniuna sooq pingaaruteqarpa Danmarkimi politikikkut allanngutit Kalaallit Nunaanni malinnaavigisssallugu ?

Danmarkimi politikikkut oqallisigineqartut, Danmarkip Kalaallit Nunaatala ungasissusiattut soqutaanngitsutut misinnarsinnaasarput.

Kisianni tassa Danmarkimi politikkikkut pisut malinnaavigineqarnissaat tunngavissaqarluarpoq. Taama isumaarpoq politikikkut naliliisartoq aamma oqaluttuarisaanermik ilinniagartooq Daniel Thorleifsen.

- Danskit naalagaaffiat Kalaallit Nunaanni oqartussaaffinnik tigumiaqartillugu, Kalaallit Nunaat folketingemi ilaasortaatitaqarnissaa pingaaruteqartoq, politikkikkut naliliisartoq Daniel Thorleifsen oqarpoq.

  - Kalaallit Nunaat Savalimmiut peqatigalugu naalagaaffeqatigiinnut ilaavoq, taamaalillunilu folketingimut marlunnik ilaasortaatitaqarluni, taamatuttaaq oqartussaaffiit nunatsinnut pingaaruteqartut arlalissuit Danmarkiminngaanniit tigummineqarput,  soorlu illersornissamut oqartussaaffik, nunanut allanut politikki eqqarsaatigalugit, taamaattumik folketingimut ilaasortaatitagut inatsisiliornermi suliassaqarput, folketingimi Kalaallit Nunaat pillugu sunniuteqarniassagunik, Daniel Thorleifsen taama oqarpoq.

AAMMA ATUARUK Juunip tallimaani qinersisoqassaaq

Folketingemut qinersinissamut maannamut qinigassanngortittut 14-iupput, taakkualu amerlassusaat pillugu Daniel Thorleifsen oqarpoq, nunatsinni partiit anginerit tassalu Siumut aamma Inuit Ataqatigiit nalinginnaasumik sisamanik qinigassanngortitaqartarput maannakkullu taamaappoq, Thorleifsen oqarpoq,

- Atassut marlunnik sassartitaqarpoq, ukiuni kingullerni ikileriarsimanerat pissutigalugu ikinnerusunik sassartitaqartarput, Daniel Thorleifsen oqarpoq.

Partiit allat aamma periarfissaqarput qinigassanngortitsinissaminnik, tassami Folketingimut qinersinissamut ullut 12-it sioqqullugit qinigassanngortitsinissamut nalunaarsimasussaapput, massakkullu sapaatit akunneri marluk periarfissaavoq qinigassanngortitassanik sassartitsisoqarnissamik, Daniel Thorleifsen oqarpoq.

Kalaallit Nunaat sinnerlugu folketingemut ilaasortat marluk

Kalaallit Nunaat, Savalimmiut peqatigalugu naalagaaffeqatigiinni ilaavoq, taamaattummilu Savalimmiut assigalugu folketingemi marlunnik ilaasortaatitaqarpoq.

Qinersisoqareernerat kingorna ilaasortanngortut taakkua marluk ataatsimiititalianut  assigiinngitsunut,

Kalaallit Nunaannut attuumassuteqartunut isumaqatiginniartarput.

Uanilu Folketingemi Kalaallit Nunaat pillugu ataatsimiititaliaq immikkut soqutiginaateqarpoq. 

Ileqquusoq naapertorlugu,  Kalaallit Nunaani qinigaasut marluk aappaa siulittaasunngortarpoq aappaalu siulittaasumut tullinngortarluni.  

AAMMA ATUARUK Folketingimut sassartut maannamut 14-iusut

Kalaallit Nunaat pillugu ataatsimiititaliami oqaluuserineqartarput,  Kalaallit Nunaata Danmarkillu akornani tunngassuteqartut.  Soorlu oqartussaaffiit Kalaallit Nunaanni Namminersorluni oqartussanit tiguneqareersut, soorlu, inuussutissarsiornermut avatangiisinut, isumaginninnermullu tunngassuteqartut, 

Kalaallit Nunaat pillugu ataatsimiititaliap saniatigut ataatsimiititaliat suleqatigiillu arlaqartut Kalaallit

Nunaannut pingaaruteqartunik isumaqatiginniartarput oqallisigalugillu.

Assersuutigalugu, Folketingi Nunat Avannarliit Siunnersuisoqatigiiffiani aallartitaqartarpoq,  tassanilu Kalaallit Nunaat sinnerlugu folketingemut ilaasortat marluk sinniisussatut inisissimasarput.

Aleqa Hammond Nunatta Qitornai ( Siusinnerusukkut Siumut)  aamma Aaja Chemnitz Larsne Inuit Ataqatgiit 2015-nimili Folketingemut ilaasortaapput.

 

 

 

Isummersuutit

#FQ2019

Aaja Chemnitz Larsen, folketingskandidat for Inuit Ataqatigiit, afgiver sin stemme til Folketingsvalget i Godthåbshallen i Nuuk. Foto: Christian Sølbeck. (Foto: Christian Klindt Sølbeck/Ritzau Scanpix)

LIVE: Aki Mathilda Høegh Dam aamma Aaja Chemnitz Larsen Folketingimut qinigaapput