Naalakkersuisut Nuummi kigutinik narlorsaasarnerit unitsikkaat
Nuummi meeqqat inuusuttullu kigutaat equngasut narlorsarneqarsinnaajunnaarput.
Narlorsaanissammi atorunnaarsinneqarput. Kigutilli narlorsarneqalereersimasut naammassineqaqqaassapput.
Naalakkersuisut tusagassiuutinut taama nalunaarput.
- Soorunami kissaatigerusuppara maannakkoqqissaaq naammattunik aningaasaateqarlutalu Kalaallit Nunaat tamaat kigutilerisunik immikkut ilinniagalinnik kigutinik narlorsaanissamut neqerooruteqarsinnaassalluta. Kisianni peqqinnissaqarfimmi suliassat allat amerlasuut pingaarutillit pissutigalugit politikeriusugut nuna tamakkerlugu kigutit narlorsartinnissaanut aningaasanut inatsimmi 2020-mut aningaasanik nassaarsinnaasimanngilagut, peqqissutsimut naalakkersuisoq, Martha Abelsen (S) oqarpoq.
Taassuma oqarnera naapertorlugu nunarput tamarmi kigutit "isumannaatsumik narlorissarneqarnissaanut neqerooruteqartoqaraluarpat" tamanna ukiumut 20 millionit koruuninik naleqassaaq.
Meeqqat ikinnerusut kigutaasa narlorsarneqarnissaat Naalakkersuisut siorna juulimi aalajangerpaat. Meeqqat kigutimi narlorsarneqarnissaannut pisariaqartitsisut kigutaasalu inissisimanerat pissutigalugu ippigisaqartut piffissami tassani neqeroorfigineqarsinnaaginnartinneqarput.
- Meeqqat kigutimi narlorsarneqarnissaanut pisariaqartitsisut sunnerneqarnavianngillat, Martha Abelsen KNR-imut siorna juulimi oqarpoq.
AAMMA ATUARUK Bøjlilertinnissamut misissuinerit sukateriffigineqartut
Aaqqissuussinerli taanna maanna atorunnaarsinneqalerpoq, ukiullu pingasut ingerlaneranni atorunnaariartortinneqassalluni.
Maanna utaqqisuni allassimasut piffissami tassani kigutaat aamma narlorsarneqassapput. Kigutileriffiit oqarasuaatikkut sianertut amerlavallaaqqunagit angajoqqaat aggeqquneqarnissaminnut utaqqinissaat kaammattuutigaat.
Nuummiinnaq neqeroorutaasoq
Bøjlit atorlugit kigutinik narlorissaaneq nunarput tamakkerlugu neqeroorutaanngisaannarpoq. Tamanna Nuummi meeqqanut inuusuttunullu neqeroorutaasimavoq, tassani ortodontimi immikkut ilinniarsimasumik kigutilerisoqarmat.
Tusagassiuutinut nalunaarut naapertorlugu immikkut ilinniagallit paasissutisiinerat naapertorlugu bøjlit atorlugit kigutinik narlorsaaneq suliaritinnerup ingerlanerani tamakkiisumi suliarineqartoq ataavartumik malinnaavigineqarsinnaanngippat, tamanna imminut illersorneqarsinnaanngilaq.
Immikkut ilisimasallip suliarineqartoq sapaatit akunneri arfinilikkaarlugit misissortanngippagu tamanna ajornerpaamik kinguneqarluni kigutip sorlaa nungusinnaavoq tamuasinnaassuserlu innarlerneqarsinnaalluni. Nakkutiginninnissamullu periarfissaq taanna nunatsinni kigutilerisoqarfimmit sinerissami tunumilu periarfissaanngisaannarsimavoq.
- Isumaga malillugu manna tikillugu innuttaasut akornanni naleqqutinngitsumik immikkoortitsisoqarsimavoq. Taamaattumik – neriuppunga piffissami qanittumi – kigutit narlorsarnissaanut akissaqaqqilerutta, taava neqeroorut kalaallit meerartaasa inuusuttortaasalu kigutimik narlorsartinnissaannut pisariaqartitsisunut tamanut atuutissaaq, Martha Abelsen oqarpoq.