Saligaatsoq Avatangiiserik akissarsisinneqartussatut innersuunneqartoq
Nunatsinni suliniut Saligaatsoq-Avatangiiserik tassaavoq Pinngortitamut Avatangiisinullu akissarsisinneqartussatut innersuunneqartut 13-it akornanniittoq.
Saligaatsoq-Avatangiiserik aalajangersimasunik suleqatigiissunik arlalinnik imaqarpoq taakkualu tamarmik avatangiisinik qaammaasaqarnissaq, attanneqarsinnaassuseq aamma pinngortitaq saligaatsoq qitiutippaat.
Taakkua iluini soorlu ilaatigut ilaapput suliffeqarfiit ukiumoortumik saliisitsisarnerat aamma Namminersorlutik Oqartussat eqqaaviit atornissaannik paasisitsiniutaat 'Qujanaq'.
- Suliniutitta suleqatigiissutiginerisa immikkuullarissutigaat, tamatta suliffeqarfinnit assigiinngitsuneersuugatta. Kommunineersuuvugut, Namminersorlutik Oqartussaneersuuvugut, KANUKOKA-meersuuvugut, kattuffinneersuvugut piumassutsiminnik ingerlatsisuneersut, minnerunngitsumillu suliffeqarfinneersuuvugut suleqatigiinnermut peqataasut, allattoqarfimmi aqutsisoq Lotte Frank Kirkegaard CSR Greenlandimeersoq oqarpoq, taassuma aqutsisoqatigiit ataqatigiissaareqatigalugit Saligaatsoq-Avatangiiserimmi suliniutit assigiinngitsut ataqatigiissartarpai.
Nunat Avannarliit Siunnersuisoqatigiivisa ukiumoortumik akissarsisitsinissaat pingasunngornermi oktobarip 29-anni Stadshusimi Stockholmimiittumi takutitsisoqarnerani tunniunneqassaaaq.
Kalaallit Nunaannit arlallit nersornaaserneqarnissaminnik innersuunneqarsimapput. Juaaka Lyberth atuakkiortut nersornaasiuttagaannik nersornaasigassatut innersuunneqarpoq, aamma Kathrine Rosing Nina Spore Kreutzmannilu meeqqanut inuusuttuaqqanullu atuakkiortunut nersornaasiuttakkamik nersornaasigassatut innersuunneqarlutik.
Taakku saniatigut Filmiliornermut nipilersornermullu tunngasunik aamma nersornaasiisoqassaaq.
