Saattormiut tikeraarneqarnissartik qilanaaraat
Saattormiut tikeraartoqarnissartik pillugu Qaasuitsup kommunianiit apriilip qaammataani allagarsisimasut nunaqarfimmi aqutsisut siulittaasuata Jakobine Thygesenip oqaluttuaraa.
Taamanikkut arlagarsigassi qanoq qisuariarpisi?
- Taama ataqqinartigisunik tikeraartoqarnissarput tusaratsigu soorunami aallaqqaammut tupaallappugut. Aqagukkut ingerlaannaq nunaqqatigiinnik aggersaavugut, piareersaasiornissamut peqataasussarsiorluta, Jakobine Thygesen oqarpoq.
Nunaqarfik Saattut 200-t missaannik innuttaasulik maannangaaq pilersaarusiorluni aallartereerpoq
Suummita nunaqarfimmi pingaarnertut takutikkusussinnaavisigit?
- Royaali Pilersuisorlu siulliullugit pulaarfigissavaat aamma meeqqerivik Amaannguaq, atuarfillu pulaassallugit, taava utoqqaat illuat kingulliullugu pulaarneqassaaq. Kingornatigut, sila ajussanngippat, atuarfiup saavani kaffisoqatigiittoqassaaq, silalu ajussappat atuarfimmi kaffisoqatigiittoqassalluni, Jakobine Thygesen oqarpoq.
Nunaqarfik Saattut qanoq sivusutigisumik kunngikkormiunit tikeraarneqassanersoq suli ilisimaneqanngilaq. Aamma nunaqarfik sinnerlugu tikilluaqqusisussaq kinaassanersoq suli aalajangerneqanngilaq.
